Abre o prazo para inscribirse no desfile-concurso do Entroido de Santiago, que incrementa os seus premios
O Concello de Santiago de Compostela abriu o prazo de inscrición para participar no desfile-concurso do Entroido 2026, cuxas bases foron publicadas este venres no Boletín Oficial da Provincia (BOP).
Desde este sábado, 24 de xaneiro, e ata o vindeiro 30 de xaneiro, todas as persoas interesadas poderán formalizar a súa inscrición a través da sede electrónica do Concello de Santiago ou por calquera dos medios previstos no artigo 16.4 da Lei 39/2015.
Entre as principais novidades desta edición destaca o incremento da dotación económica dos premios, que pasa de 14.000 a 16.000 euros. O maior aumento prodúcese na categoría de comparsas do propio Concello de Santiago, que por primeira vez equipara os seus premios cos das comparsas procedentes doutros municipios. O premio á mellor comparsa ascende a 1.600 euros.
Ademais, créase un cuarto premio para comparsas, dotado con 700 euros. Na categoría de carrozas, a mellor recibirá un premio de 2.000 euros. O mellor disfraz de grupo estará dotado con 700 euros, mentres que os premios para disfrace individual e de parella serán de 300 euros cada un.
Outra das novidades desta edición é a creación dunha categoría específica para os centros de ensino, coa concesión de dous premios: un primeiro de 500 euros e un segundo de 300 euros.
O xurado valorará aspectos como o deseño, a composición, o colorido, a investigación, a orixinalidade e a imaxinación, así como a posta en escena, a coreografía e a harmonía das propostas presentadas.
O desfile do Entroido celebrarase o martes 17 de febreiro, a partir das 17:30 horas, con saída desde a avenida de Ferrol e percorrido polas rúas Frei Rosendo Salvado, Praza Roxa, República do Salvador, Hórreo e Senra, para rematar na avenida de Xoán Carlos I.