ADEGA alerta da aparición dunha planta en perigo crítico de extinción no trazado da variante de Carballo
ADEGA denunciou a aparición dunha nova poboación de Euphorbia uliginosa —coñecida como leiteiriña das brañas— no trazado aprobado para a variante de Carballo, unha infraestrutura autorizada recentemente polo Consello da Xunta. A organización ecoloxista advirte de que se trata dunha especie catalogada en Galicia como “En perigo de extinción” e considerada pola Unión Internacional para a Conservación da Natureza (UICN) como “En perigo crítico”, o máximo nivel de ameaza antes da extinción en estado silvestre.
Segundo explica a entidade, a presenza desta planta non foi recollida durante a tramitación ambiental da obra, que foi sometida a unha avaliación simplificada e obtivo un informe de impacto ambiental favorable. ADEGA sostén que a Administración non tivo en conta a posible existencia de flora ameazada na zona, malia que durante o período de exposición pública xa se presentaran alegacións advertindo da proximidade dun dos núcleos máis importantes desta especie a nivel mundial.
A organización sinala que foi durante unhas prospeccións de campo realizadas o pasado mes de xullo cando localizou unha nova poboación de Euphorbia uliginosa directamente afectada polo trazado previsto. No mesmo enclave tamén foi identificada a gramínea Agrostis juresii, catalogada como vulnerable no Catálogo Galego de Especies Ameazadas.
ADEGA considera que a avaliación ambiental da variante foi insuficiente e defende que o proxecto debería terse sometido a unha avaliación ambiental ordinaria, acompañada de estudos máis exhaustivos sobre a presenza de especies protexidas. A entidade critica que nin a documentación técnica nin a autorización ambiental fixeran referencia á posible presenza destes taxóns.
Ante esta situación, a asociación comunicou os seus achados á Xunta e reclamou a aplicación dos condicionantes recollidos no propio informe ambiental, que establecen a prohibición de realizar actuacións que afecten especies incluídas no Catálogo Galego de Especies Ameazadas. Ademais, solicita unha nova prospección de campo para avaliar con maior detalle a presenza destas plantas e adoptar as medidas necesarias para garantir a súa conservación.
Desde ADEGA consideran que este caso evidencia deficiencias na tramitación ambiental de determinadas infraestruturas e advirten de que a situación podería derivar en novos atrasos e custos engadidos para o desenvolvemento do proxecto.