ADEGA cuestiona o estado de conservación do lobo e critica a metodoloxía da Xunta no informe sexenal
ADEGA presentou alegacións no marco do proceso de información pública do informe sexenal sobre a especie Canis lupus, promovido polo MITERD, no que rexeita a avaliación realizada pola Xunta, que considera que o lobo se atopa nun estado de conservación favorábel.
A organización ecoloxista sostén que as evidencias científicas recollidas no informe estatal indican que a especie está nun estado de conservación desfavorábel tanto no conxunto do Estado como en Galicia. Pola contra, critica que o documento alternativo da Xunta defende unha situación favorábel baseada en datos e argumentos que considera metodoloxicamente débiles.
Segundo ADEGA, os datos da Xunta proceden do censo 2021-2022, no que se estimou a presenza de 93 mandas reprodutoras, incluídas 21 compartidas con outras comunidades autónomas e Portugal. Porén, denuncia cambios metodolóxicos nos traballos de campo, ao engadirse en 2022 mostras parciais realizadas en zonas concretas e con criterios distintos aos aplicados no censo xeral, o que, ao seu xuízo, distorsiona os resultados finais e podería inflar a estimación de poboación.
A entidade ecoloxista afirma que, se só se tivesen en conta os datos de 2021, a estimación sería inferior, arredor de 76 mandas, o que modificaría o diagnóstico sobre o estado de conservación da especie en Galicia.
ADEGA tamén cuestiona a interpretación da evolución da poboación, e sinala que, mesmo cos datos oficiais, o crecemento sería practicamente nulo, mentres que con estimacións máis baixas se situaría en valores negativos, o que indicaría estancamento ou regresión. Engade que a falta de crecemento en sete anos podería explicarse pola mortalidade non natural, como furtivismo, e estima entre 200 e 300 lobos mortos ao ano por estas causas.
Finalmente, a organización critica a xestión da Xunta e menciona unha sentenza do Tribunal Superior de Xustiza de Galicia na que se cuestiona a falta de verificación técnica suficiente nos informes administrativos sobre danos atribuídos ao lobo. ADEGA conclúe que existe unha utilización política da especie e reclama unha xestión baseada en criterios científicos e na mellora da coexistencia coa gandaría.