Actualidade

O aviso estará activado ata as 21:00 horas

A Axencia Estatal de Meteoroloxía (AEMET) activou unha alerta laranxa na provincia de Ourense e no sur de Lugo debido a un episodio de altas temperaturas que poderían chegar aos 40 graos na zona do Miño. O aviso estará vixente ata as 21:00 horas deste luns.

Ademais da conca do Miño, o aviso afecta tamén ao noroeste e sur da provincia de Ourense, así como a zonas do sur lucense. As autoridades recomendan extremar as precaucións, especialmente durante as horas centrais do día, entre as 12:00 e as 18:00 horas, para evitar golpes de calor.

Entre as recomendacións inclúense:

• Evitar saír á rúa durante as horas de máis calor.
• Beber líquidos con frecuencia, aínda que non se teña sede, sobre todo auga e zumes de froita lixeiros.
• Evitar comidas copiosas e quentes, optando por froitas, verduras e comidas lixeiras en pequenas cantidades ao longo do día.
• Reducir a actividade física e descansar á sombra.
• Usar roupa lixeira, de cores claras e tecidos naturais, ademais de protección solar, lentes de sol e sombreiro.
• Permanecer en espazos ventilados ou con aire acondicionado.
• Na casa, utilizar as estancias máis frescas, manter as xanelas e persianas pechadas durante o día e abrilas pola noite para ventilar.
• Conservar ben os alimentos e mantelos no frigorífico.
• Non deixar nenos nin persoas maiores dentro de vehículos estacionados, aínda que teñan as ventás entreabertas.

As autoridades insisten en seguir estas medidas de prevención para evitar riscos ante a persistencia das altas temperaturas.