Ana Pontón presenta ao BNG como a alternativa contra un PP que vende Galiza ás multinacionais a prezo de saldo

A portavoz nacional do BNG, Ana Pontón, reivindicou ao Bloque como a única alternativa fronte a un Goberno do PP "ultra, antidemocrático e antigalego", que pon en risco o futuro do país coa macrocelulosa de Altri, a megaminería contaminante e o espolio eólico. Pontón denunciou a intención de Rueda de destinar 250 millóns de euros de fondos públicos á macrocelulosa, e propuxo que eses cartos se dediquen a apoiar os sectores produtivos, revitalizar o rural e rexenerar as rías galegas.
A líder nacionalista acusou ao PP de "colonizar medios públicos", utilizar o "bulo e a mentira" e desprezar a cidadanía que protesta contra as súas políticas. Ademais, asegurou que o BNG actuará "como goberno alternativo", utilizando todos os mecanismos sociais, institucionais e legais para defender os intereses de Galicia.
Pontón reivindicou tamén a posición pacifista e contraria ao militarismo do Bloque, especialmente nun contexto internacional preocupante, e reiterou o compromiso coa defensa da paz, da soberanía e das liberdades democráticas.