Actualidade

A pesar de tímidos avances grazas a medidas como as melloras do SMI e a reforma laboral

De cara ao 8 de marzo, Día Internacional da Muller Traballadora, UGT-Galicia denuncia a situación sociolaboral das mulleres galegas, caracterizada por unha menor actividade e ocupación, maior desemprego, segregación horizontal e vertical, máis temporalidade e parcialidade, e a persistente brecha salarial.

Ademais, as mulleres seguen asumindo a maior parte das tarefas do fogar e dos coidados familiares, o que frea o seu acceso ao mundo laboral e limita as súas carreiras profesionais.

Aínda que hai dous avances importantes impulsados por UGT —a suba progresiva do SMI e a reforma laboral—, o camiño cara á igualdade real segue sendo longo e complexo.

Datos alarmantes sobre a situación laboral das mulleres en Galicia

• Segundo a EPA de 2024, a taxa de actividade feminina en Galicia é do 49,4%, mentres que a masculina alcanza o 57,4%, unha diferenza de case 8 puntos.
• Galicia rexistra a terceira taxa de actividade feminina máis baixa do Estado, só por diante de Asturias (47,7%) e Estremadura (49,4%).
• O 89,4% das persoas que deixan de buscar emprego para coidar menores ou dependentes son mulleres.
• A fenda na taxa de emprego entre homes e mulleres é de 7,8 puntos.
• O 74,6% dos contratos a tempo parcial corresponden a mulleres.
• A taxa de paro feminina (10%) é 1,2 puntos superior á masculina (8,8%).
• As mulleres representan só o 30,8% dos postos de dirección e xerencia.
• A brecha salarial en Galicia segue no 17,7%.

UGT esixe accións urxentes para garantir a igualdade laboral

UGT-Galicia reclama medidas concretas para reducir a desigualdade de xénero no emprego, entre as que destacan:

• Aumento progresivo do SMI ata o 60% do salario medio para reducir a fenda salarial.
• Obrigatoriedade do cumprimento dos plans de igualdade nas empresas.
• Medidas para erradicar a segregación laboral e garantir oportunidades equitativas en todos os sectores.
• Aprobación de permisos retribuídos para o coidado familiar, de carácter individual e intransferibles.
• Incremento do investimento en servizos públicos de coidados para liberar ás mulleres desta carga.
• Maior vixilancia e sancións ás empresas que incumpran as normativas de igualdade.