As Escolas de Saúde da Atención Primaria de Ourense, premio nacional en promoción da alimentación saudable
A Subdirección de Enfermaría de Atención Primaria da Área Sanitaria de Ourense, Verín e O Barco de Valdeorras foi recoñecida nos XIX Premios NAOS 2025 na categoría de “Promoción dunha alimentación saudable no ámbito familiar e comunitario” grazas ao proxecto das Escolas de Saúde da Atención Primaria. O galardón, outorgado pola Axencia Española de Seguridade Alimentaria do Ministerio de Derechos Sociales, Consumo y Agenda 2030 e publicado no BOE o pasado 16 de marzo, destaca o compromiso dos profesionais de Atención Primaria coa promoción da saúde e a prevención da enfermidade, recoñecendo o impacto das accións comunitarias desenvolvidas na área sanitaria.
“As Escolas de Saúde constitúen un modelo innovador baseado na educación para a saúde, a participación activa da cidadanía e o traballo en rede con axentes comunitarios”, explican desde a Área Sanitaria. O proxecto está liderado por referentes en saúde comunitaria e desenvolvido por equipos multidisciplinares que achegan coñecementos e ferramentas prácticas para fomentar hábitos de vida saudables entre a poboación. Durante o seu primeiro ano, en 2024, puxéronse en marcha 71 programas distintos, impartíronse 284 talleres e participaron 3.865 persoas, cunha implicación directa de 128 profesionais sanitarios. Estes datos reflicten “a consolidación dun modelo eficaz, participativo e sostible, con altos niveis de satisfacción entre a poboación participante”.
Verónica Civeira Pérez, subdirectora de Enfermaría de Atención Primaria, destaca que “este premio é, sobre todo, un recoñecemento ao esforzo diario dos equipos de Atención Primaria e á súa capacidade para construír saúde desde a proximidade e o compromiso coa comunidade”, e subliña a importancia das Escolas de Saúde na transformación do modelo asistencial. “As Escolas de Saúde representan unha maneira diferente de entender a atención sanitaria, máis participativa, máis próxima e centrada nas persoas, onde a educación para a saúde e o empoderamento da cidadanía son fundamentais”, salienta a subdirectora.
O proxecto tamén se caracteriza pola súa adaptabilidade ás necesidades reais da poboación, mediante metodoloxías participativas e dinámicas que fomentan a implicación cidadá, así como pola colaboración con concellos, asociacións veciñais e outros recursos comunitarios, fortalecendo as redes de apoio e o tecido social.
Desde a Área Sanitaria expresan o seu agradecemento a todos os profesionais implicados, ás entidades colaboradoras e á cidadanía participante, “que contribúen a facer das Escolas de Saúde un proxecto vivo e en constante crecemento”. “Seguiremos traballando con e para a comunidade, acompañando, escoitando e avanzando xuntas e xuntos cara a unha sociedade máis saudable. Este premio anímanos a continuar e a seguir innovando na promoción da saúde”, asegura Civeira Pérez. O premio será entregado nun acto en novembro en Madrid, na sede da Agencia de Seguridad Alimentaria y Nutrición (AESAN).