As granxas leiteiras da provincia da Coruña modernizan o control da produción coa chegada de novos sistemas automatizados
As explotacións leiteiras da provincia da Coruña contarán con novos recursos para modernizar os procesos de control da produción e da calidade do leite. A Deputación da Coruña concedeu unha axuda de 4.800 euros a AFRICOR Coruña para a adquisición de catro equipos automáticos destinados á toma de mostras nas granxas que dispoñen de sistemas de muxido robotizado.
A deputada de Mar e Medio Rural da Deputación, Cristina Capelán Cancelo, mantivo unha reunión en Santiago coa directiva de AFRICOR Coruña para coñecer o proxecto e as necesidades que está a xerar a expansión deste tipo de tecnoloxía nas explotacións de vacún de leite.
Os novos dispositivos permitirán realizar de maneira automatizada a recollida de mostras individuais de leite de cada animal, garantindo a súa correcta identificación e facilitando a obtención de datos fiables sobre a produción e as características do leite.
A iniciativa beneficiará directamente a arredor de 133 explotacións gandeiras integradas no programa de control leiteiro de AFRICOR Coruña e que xa empregan sistemas de muxido robotizado. Os equipos poderán trasladarse entre diferentes granxas, polo que o seu uso se estenderá a distintos municipios da provincia.
Unha das principais vantaxes destes equipamentos é a súa compatibilidade con diferentes marcas e modelos de robots de muxido. Ademais, permiten realizar a toma de mostras sen alterar o funcionamento habitual das instalacións, facilitando a integración do control leiteiro nos procesos automatizados das explotacións.
A mecanización deste traballo tamén permitirá reducir posibles erros derivados da manipulación manual, diminuír os tempos necesarios para realizar as tarefas e mellorar a organización do servizo de control leiteiro.
Os datos obtidos a través destas análises teñen unha aplicación directa na xestión das explotacións. A información sobre a produción e a composición do leite permite ás ganderías adoptar decisións relacionadas coa alimentación, a xestión produtiva e a selección dos animais, ademais de contribuír aos programas de mellora xenética.
A adaptación dos servizos de control ás novas tecnoloxías cobra especial relevancia ante a progresiva incorporación de sistemas robotizados nas explotacións leiteiras. A incorporación destes equipos permitirá que o seguimento da produción se manteña adaptado ás novas formas de traballo das granxas.
AFRICOR Coruña é unha asociación provincial de gandeiros sen ánimo de lucro creada en 1992 para desenvolver o control leiteiro oficial na provincia. A entidade, integrada na Federación Frisona Galega, traballa na mellora xenética da raza frisona e ofrece información técnica ás explotacións asociadas.
Entre as súas funcións está a recollida de datos individuais dos animais e de mostras de leite para analizar parámetros como a porcentaxe de graxa, a proteína ou o reconto de células, información que posteriormente pode empregarse para mellorar a xestión e o rendemento das explotacións.