As mulleres autónomas en Galicia traballan de media 4 horas máis ao día ca os homes autónomos
As mulleres representan o 41% das persoas autónomas en Galicia (82.759), pero seguen enfrontándose a unha fenda salarial do 30% respecto aos seus homólogos homes, segundo un estudo de UPTA España sobre a igualdade e os tempos de traballo no colectivo. Con motivo do Día Internacional da Muller (8M), a organización denuncia as desigualdades persistentes no ámbito do traballo autónomo, onde as mulleres traballan de media 4 horas máis ao día ca os homes.
A esta carga de traballo remunerado hai que sumarlle o traballo non remunerado, que inclúe os coidados e as tarefas do fogar. De feito, as mulleres autónomas destinan 14 horas máis á semana ca os homes a estas tarefas, o que agrava a fenda de tempo e dificulta a súa conciliación entre a vida profesional e persoal.
Fenda na xubilación e dificultades no acceso a financiamento
A desigualdade tamén se traslada ao momento da xubilación: as mulleres autónomas perciben, de media, pensións un 25% inferiores ás dos homes (1.120,58 € fronte a 841,91 €). Este dato reflicte a precariedade que arrastran ao longo das súas vidas laborais.
Ademais, o acceso ao financiamento segue sendo un obstáculo. As mulleres teñen un 25% menos de posibilidades de obter un crédito empresarial ca os homes debido á falta de avais ou garantías económicas. Esta barreira limita a súa capacidade de emprendemento e crecemento empresarial, o que repercute na súa estabilidade e desenvolvemento profesional.
Barreiras de xénero en sectores masculinizados
Aínda que as mulleres teñen unha forte presenza no sector servizos e en actividades cualificadas, a súa representación en sectores como a construción, a industria ou o transporte apenas acada o 10%.
As que logran abrirse camiño nestes ámbitos deben enfrontarse a barreiras invisibles como a discriminación, o rexeitamento e o acoso. Para analizar estas dificultades, UPTA España publicou un informe específico sobre a muller autónoma en sectores masculinizados, que pode consultarse aquí:
🔗 Estudo: "O desafío da muller autónoma en sectores masculinizados"
UPTA reclama medidas urxentes
Desde UPTA esixen un cambio real e urxente para eliminar a discriminación de xénero no traballo autónomo. A igualdade non pode ser só un discurso político, senón unha realidade tanxible que garanta as mesmas oportunidades e dereitos para as mulleres autónomas.
O presidente de UPTA, Eduardo Abad, subliña que:
"As mulleres traballadoras autónomas levan anos demostrando unha gran capacidade e dedicación, pero aínda se enfrontan a barreiras que limitan o seu desenvolvemento profesional. Desde UPTA, estamos comprometidos en visibilizar o seu traballo, promover políticas públicas que favorezan o seu crecemento e fomentar a igualdade efectiva. Debemos seguir traballando para eliminar a discriminación, fomentar a corresponsabilidade e garantir que as mulleres teñan as mesmas oportunidades ca os homes”.