As Pontes centra a formación da Rede de Experiencias Turísticas do Carbón na transformación do territorio
O Ministerio para a Transición Ecolóxica e o Reto Demográfico (MITECO), a través do Instituto para a Transición Xusta (ITJ) e da Fundación Ciudad de la Energía (CIUDEN), pon en marcha esta semana o programa formativo da Rede de Experiencias Turísticas do Carbón, da que forma parte As Pontes de García Rodríguez xunto con León, Teruel, Córdoba e as comarcas mineiras asturianas.
A primeira sesión formativa terá lugar este mércores, 23 de setembro, na sede da CIUDEN en Ponferrada, e dará inicio a un programa destinado a preparar os xestores locais para o deseño e a promoción de actividades turísticas vinculadas ao patrimonio mineiro-industrial do carbón. O obxectivo é contribuír á diversificación económica dos territorios, incrementar a cooperación entre eles e xerar novas oportunidades no marco da transición xusta.
No caso das Pontes, a formación terá como eixo a construción dun relato territorial capaz de conectar a historia do carbón e da enerxía coa transformación da paisaxe e do territorio, así como coas novas oportunidades vinculadas ao turismo. A iniciativa busca, deste xeito, poñer en valor a identidade mineira das Pontes e aproveitar o seu patrimonio e as transformacións experimentadas nas últimas décadas como elementos para desenvolver novas experiencias turísticas.
A Rede comezou a súa actividade tras varios meses de traballo e despois do primeiro encontro cos seus socios, celebrado en decembro de 2025 na sede do ITJ. As accións formativas proporcionarán aos responsables locais coñecementos e ferramentas para impulsar destinos relacionados co patrimonio mineiro-industrial e favorecer a creación dunha estrutura estable de cooperación entre os territorios con tradición mineira.
O proxecto pretende compartir coñecementos, desenvolver produtos turísticos conxuntos e poñer en valor un patrimonio común como elemento diferenciador das zonas de transición xusta. A rede permanece ademais aberta á incorporación de novos actores e territorios.
As actividades formativas foron deseñadas en función das características de cada zona e adaptaranse ás necesidades identificadas xunto cos socios estratéxicos e os axentes locais. Ademais do patrimonio mineiro-industrial, o programa abordará cuestións relacionadas coa creación dun relato común, a conexión coa paisaxe, a cultura e a gastronomía, así como o turismo activo, a comercialización, a sustentabilidade e a accesibilidade.
En Asturias, as sesións estarán orientadas á transformación dos recursos mineiros en produtos e experiencias turísticas e á colaboración entre concellos, equipamentos e empresas das concas mineiras. En Córdoba, o programa centrarase na interpretación e posta en valor do patrimonio mineiro-industrial do Val do Guadiato e na creación de experiencias integradas nunha oferta turística conxunta.
Pola súa banda, en Teruel afondarase na profesionalización dos axentes, na transmisión da memoria mineira, na xestión dos recursos e na creación de produtos turísticos que conecten os principais elementos patrimoniais das concas mineiras.
A Rede tamén terá presenza en foros especializados. A directora xeral da CIUDEN, Yasodhara López, participará nas XXVIII Xornadas Internacionais de Patrimonio Industrial, que se celebran do 23 ao 26 de setembro en Xixón. A súa intervención terá lugar o día 24, ás 13.15 horas, no Salón do Paraninfo Laboral, baixo o título Reimaxinar os territorios do carbón. Patrimonio, cultura e turismo.
A través deste programa, As Pontes incorpórase a unha iniciativa que pretende aproveitar o legado mineiro e enerxético dos territorios para impulsar novos usos turísticos e reforzar a cooperación entre zonas que comparten unha historia marcada polo carbón e que afrontan agora o reto de construír novas oportunidades económicas e sociais.