As rochas e fósiles do Xeoparque Montañas do Courel estarán presentes na XII Feira de Minerais de Santiago
Unha mostra de rochas e fósiles do Xeoparque Montañas do Courel poderá visitarse os días 5, 6, 7 e 8 de marzo na XII Feira de Minerais de Santiago de Compostela, que se celebrará no Centro Comercial Área Central.
O evento reunirá durante catro xornadas a coleccionistas, expositores e público interesado no mundo da mineraloxía e da paleontoloxía. Nesta edición, a feira ampliará a súa programación con máis obradoiros dirixidos a centros educativos e contará cun maior número de expositores, co obxectivo de mellorar a calidade expositiva.
Ademais da representación do Xeoparque Montañas do Courel, os asistentes poderán contemplar unha destacada colección de fósiles procedentes de Marrocos, así como exposicións de minerais do Museo de Minerais do Porriño e do Museo de Historia Natural de Santiago de Compostela.