Actualidade | Sindicatos

A segunda xornada de folga nas residencias privadas mostra a firmeza das traballadoras fronte aos servizos mínimos abusivos e chama a unha gran manifestación o 26 de abril.

As traballadoras das residencias privadas secundan este martes a segunda das catro xornadas de folga convocadas pola CIG para esixir un convenio colectivo digno e salarios xustos. A pesar dos servizos mínimos impostos pola Xunta, que impiden a moitas traballadoras exercer o seu dereito á folga, a mobilización é visible nas concentracións espontáneas diante das residencias en múltiples cidades e vilas.

Estes paros, que contan con apoio en localidades como A Coruña, Ourense, Vigo, Compostela, Pontevedra, Ferrol, Vilagarcía, Noia, Ribeira, Castro de Rei ou Carballo, denuncian sobrecarga laboral, salarios baixos e a precarización do sector. A situación en centros como DomusVi Laraxe (Ferrolterra), sen ascensores operativos para grandes dependentes, exemplifica a falta de medios.

A CIG denuncia o inmobilismo da patronal, que leva sen negociar desde outubro, e a inacción da Xunta, á que reclama maior implicación na mellora das condicións laborais. O sindicato fai un chamamento a participar masivamente na manifestación nacional convocada para o sábado 26 de abril ás 11:00h, con saída dende a Alameda de Santiago de Compostela. As seguintes xornadas de folga serán o 7 e o 21 de maio.