Besteiro: “A traxedia dos lumes foi devastadora, pero a xestión do PP aínda a fixo peor”
O secretario xeral do PSdeG, José Ramón Gómez Besteiro, inaugurou este 1 de setembro en Ourense o curso político cun encontro con alcaldes, alcaldesas e voceiros socialistas de toda Galicia, así como cos presidentes das deputacións de Lugo e da Coruña, José Tomé e Valentín González Formoso, e o presidente da Fegamp, Alberto Varela.
Na reunión participaron rexedores de diferentes municipios, entre eles Vigo, Monforte, Cerceda e Ribeira de Piquín, así como representantes da provincia de Ourense máis afectada polos incendios. Outros concellos tamén estiveron presentes de maneira telemática.
Besteiro lembrou a súa visita á zona afectada en Valdeorras a pasada semana e asegurou que este encontro responde á promesa feita ao alcalde de Vilamartín: “Comprometinme a convocar de inmediato unha reunión cos alcaldes e alcaldesas socialistas para analizar o sucedido e preparar a nosa resposta política. E hoxe cumprimos esa palabra”.
O líder socialista destacou que a prioridade durante a vaga de incendios era “apagar os lumes e protexer vidas e bens”, pero insistiu en que agora é tempo de pedir responsabilidades. “A maior traxedia non foron só os incendios, senón que a súa xestión quedara en mans dun PP incompetente, que sempre mira para outro lado e nunca asume os seus erros”.
Críticas á Xunta
Besteiro subliñou que a Xunta ten competencias exclusivas en prevención e extinción e que a súa actuación foi “un fracaso absoluto”: “No 2018 aprobamos 123 medidas nun ditame conxunto sobre incendios. O PP tivo sete anos para aplicalas e non fixo nada. O resultado vímolo este agosto: montes abandonados, falta de medios e un rural desprotexido”.
Tamén acusou o PP de manter unha actitude “negacionista e neglixente” ante a emerxencia climática: “Non se pode combater unha emerxencia global cun goberno autonómico instalado na propaganda e na improvisación. Necesitamos planificación, prevención e recursos, non máis escusas”.
Axenda municipalista e Pacto de Estado
O encontro abordou tamén cuestións como a financiación municipal e autonómica, a cohesión territorial e o apoio aos concellos que asumen competencias impropias sen fondos suficientes.
Finalmente, sobre o Pacto de Estado contra o Cambio Climático anunciado polo presidente do Goberno, Pedro Sánchez, Besteiro foi claro: “Rueda debe facelo, pero dubido moito que o vaia facer. Levan 17 anos no poder e nin sequera puxeron en marcha as recomendacións que eles mesmos aprobaron. O PP é incapaz de pasar da foto á acción”.
No acto tamén interviñeron a secretaria de Organización do PSdeG, Lara Méndez, a portavoz de Política Forestal no Parlamento, Carmen R. Dacosta, e o secretario provincial, Álvaro Vila.