Besteiro apela á unidade fronte ao “peor da política” e defende un proxecto honrado para Galicia
O secretario xeral do PSdeG, José Ramón Gómez Besteiro, chamou este sábado á unidade e ao orgullo de “representar un proxecto honrado, que dá a cara e expulsa a quen pretende aproveitarse”. Advertiu da alianza entre PP e Vox, asegurando que “a suma de dous partidos condenados por corrupción non dá un goberno limpo”.
Na presentación do novo secretario xeral de Pontevedra, Iván Puentes, acompañado por David Regades e Carmela Silva, Besteiro puxo en valor a resposta inmediata do PSOE ante casos de corrupción, contrastando coa actitude do PP en Galicia e o caso do hospital Álvaro Cunqueiro.
Acusou ao PP de empregar Galicia como “banco de probas do peor da política”, con prácticas de corrupción, xudicialización e amiguismo. Alertou da presenza de máis de 150 cargos imputados entre PP e Vox.
Defendeu a xestión do goberno progresista, que segundo explicou supuxo un 40% máis de recursos para Galicia que os sete anos de Rajoy. Criticou a ineficiencia do PP na execución de fondos estatais e europeos, e acusouno de ocultar durante cinco meses unha denuncia de agresión sexual contra o conselleiro do Mar.
Respondeu ás críticas da Conferencia Episcopal cunha proposta irónica: “Un bautizado, un voto”, reprochando a súa inxerencia política.
Recordou os 20 anos da chegada de Touriño á Xunta como inicio dunha etapa de dignidade e políticas sociais, e sinalou que Iván Puentes representa agora unha alternativa ao modelo esgotado de Pontevedra.
Iván Puentes cualificou de “infamia” a Operación Pulpo e destacou a honestidade de Besteiro. Carmela Silva e David Regades tamén cargaron contra o PP, lembrando casos como o de Louzán ou a contradición entre Ence e Altri.