Besteiro carga contra Feijóo e pide concentrar o voto no PSOE para lograr «o cambio necesario»

O secretario xeral do PSdeG, José Ramón Gómez Besteiro, reclamou este domingo en O Barco de Valdeorras o apoio electoral para o Partido Socialista e pediu evitar a dispersión do voto progresista. Durante un mitin acompañado polas candidatas ao Congreso, Carmen Rodríguez Dacosta, e ao Senado, María Fernández Ojea, defendeu que cada papeleta que non vaia ao PSOE pode acabar favorecendo a Alberto Núñez Feijóo e Santiago Abascal.
Besteiro insistiu en que os próximos comicios representan un momento decisivo e apelou á concentración do voto da esquerda. Neste sentido, destacou a importancia dos acordos entre PSOE e Sumar para aumentar a representación progresista e lembrou que en Ourense os socialistas quedaron hai catro anos a tan só 3.000 votos de conseguir un segundo deputado.
O dirixente socialista tamén dirixiu boa parte das súas críticas ao candidato do PP, Alberto Núñez Feijóo, ao que respondeu con ironía despois de que este afirmase que acudía pedir traballo. «Coñecemos ben a súa xestión. Non lle imos dar traballo. Imos mandalo ao paro», sinalou.
Un dos principais reproches de Besteiro centrouse nas promesas electorais do candidato popular en materia de vivenda. Cuestionou que Feijóo se comprometa a construír un millón de vivendas nunha lexislatura cando, segundo lembrou, durante os seus 13 anos á fronte da Xunta non foi quen de impulsar ningunha. Como contraste, destacou que o Goberno de Emilio Pérez Touriño construíu 10.000 vivendas en Galicia en catro anos.
Tamén ironizou sobre a intención de Feijóo de chegar desde a Xunta á Moncloa «en liña recta» e advertiulle de que tería que ter coidado coas curvas.
Durante a súa intervención, Besteiro contrapuxo os modelos de xestión do Partido Popular e do PSOE ante as diferentes crises económicas e sociais. Lembrou que, segundo a súa valoración, os gobernos de Mariano Rajoy apostaron polos recortes e os sacrificios, mentres que Pedro Sánchez deu a cara ante situacións como a pandemia, as guerras, a suba de prezos, os incendios, as danas e a erupción volcánica.
O secretario xeral do PSdeG defendeu que o actual Goberno conseguiu manter o crecemento económico e preservar o estado do benestar, asegurando que España medrou por riba de países como Francia e Alemaña. Resumiu esta política na idea de combinar crecemento económico e reparto da riqueza.
VIVENDA E PENSIÓNS, ENTRE OS PRINCIPAIS RETOS
A vivenda foi outro dos asuntos centrais do discurso. Besteiro defendeu a necesidade de moderar os prezos e propuxo medidas como a creación dun banco público de alugueiro que permita incorporar ao mercado vivendas baleiras. Segundo explicou, esta fórmula podería ofrecer garantías aos propietarios e ampliar a oferta dispoñible.
En materia de pensións, alertou das intencións que atribúe ao PP e a Vox de avanzar cara a un modelo mixto, cunha menor cobertura pública e maior peso dos sistemas privados complementarios. O dirixente socialista defendeu o mantemento dunhas pensións públicas dignas e lembrou que a hucha da Seguridade Social supera actualmente os 20.000 millóns de euros, fronte aos 4.000 millóns que, segundo indicou, había cando Rajoy abandonou o Goberno.
Besteiro tamén criticou o que considera unha estratexia da dereita para debilitar os servizos públicos e favorecer a expansión da sanidade, a educación e os sistemas de pensións privados. «Rescataron os bancos, pero non queren rescatar as persoas», afirmou.
Na parte final da súa intervención, Besteiro referiuse ás necesidades específicas de provincias como Ourense e Lugo, onde considerou prioritario mellorar a mobilidade, reforzar os servizos públicos e garantir a estabilidade do sistema de pensións.
Lembrou que máis dun terzo da poboación de Ourense depende dunha pensión pública e defendeu que as políticas socialistas son especialmente necesarias en territorios con estas características.
Por último, pediu tamén aos votantes de Sumar e do BNG que apoien o Partido Socialista para facilitar unha vitoria electoral da esquerda. «Non abonda con gañar. Queremos gobernar para que gañe a xente», concluíu.