Besteiro esixe a destitución de Diego Calvo e reclama a Rueda que defenda a Vigo tras a “chanchullada” do Mundial 2030
O secretario xeral do PSdeG e voceiro parlamentario, José Ramón Gómez Besteiro, reclamou este martes a destitución inmediata do conselleiro de Presidencia, Diego Calvo, tras afirmar que Vigo quedou fóra do Mundial 2030 por “carencias da proposta” e pola “ausencia de influencia do Goberno local”. Unhas declaracións que, segundo Besteiro, “evidencian a politización absoluta do proceso” e supoñen unha falta de respecto institucional “inaceptable”.
O líder socialista anunciou o rexistro dunha proposición non de lei no Parlamento galego para esixir a publicación de todos os criterios e puntuacións das candidaturas. Tamén reclama explicacións ao presidente da Federación Española de Fútbol, Rafael Louzán, a quen acusa de actuar “de costas a Vigo” e sen transparencia.
O PSdeG lembra que, segundo informacións publicadas por El Mundo, o estadio de Balaídos ocupaba inicialmente o posto 11 na avaliación técnica, suficiente para ser sede, pero foi rebaixado sen explicacións. Besteiro insiste en que “o que se fixo con Vigo é unha chanchullada política e un castigo do PP á cidade”.
Bonificación na AP-53
Besteiro tamén valorou positivamente a aprobación, este martes no Consello de Ministros, da bonificación do 75% para usuarios recorrentes da AP-53 entre Santiago e Ourense. “É unha medida de xustiza que pon fin a anos de desigualdade e que responde a unha reivindicación histórica do PSdeG”, salientou.