Besteiro esíxelle a Rueda todos os medios para apagar o incendio do vertedoiro da Rúa
O secretario xeral do PSdeG, José Ramón Gómez Besteiro, esixiulle hoxe ao presidente da Xunta, Alfonso Rueda, que “deixe de mirar para outro lado” e active todos os recursos dispoñibles para extinguir o incendio do depósito de Residuos Non Perigosos das Pedreiras, no Concello da Rúa, que leva ardendo desde o 15 de agosto a consecuencia dun lume forestal.
Tras unha visita á zona, Besteiro advertiu que a situación está a derivar nun problema de saúde pública, xa que os gases e fume tóxicos poñen en risco á veciñanza da Rúa e dos concellos limítrofes. Criticou que a única resposta da Xunta fora “botar balóns fóra”, atribuíndo a responsabilidade ao Concello e limitándose a facer seguimento da calidade do aire.
“Non se nos ocorrería dicirlle a un particular que é a súa responsabilidade apagar o lume que arrasa a súa casa”, afirmou, subliñando que “o que pasa na Rúa é a proba de como goberna Rueda: sempre ausente cando hai problemas”.
Besteiro advertiu de que esta situación evidencia “17 anos de goberno do PP nos que o rural foi quedando atrás, sen apoio nin solucións”. Na visita estivo acompañado pola tenente de alcalde da Rúa, Ana Fernández, quen reclamou a intervención da Xunta para mobilizar ata 14.000 metros cúbicos de terras e equipamento especializado, recursos imposibles de asumir por un concello pequeno.
Fernández insistiu en que “o incendio seguirá ardendo e contaminando ao Concello da Rúa e aos do arredor mentres non poñan enriba da mesa os medios necesarios para a súa extinción”.