Actualidade

Besteiro defende que a mina de Doade é estratéxica para a autonomía industrial europea e reclama rigor ambiental, fronte a un proxecto como Altri que non cumpre os requisitos para recibir fondos públicos.

O secretario xeral do PSdeG, José Ramón Gómez Besteiro, diferenciou hoxe con claridade o proxecto da mina de litio de Doade e o da celulosa de Altri. “O litio é estratéxico, pero a celulosa non”, asegurou, defendendo que a explotación en Beariz está aliñada cos obxectivos de reindustrialización sostible e autonomía tecnolóxica que marca a Unión Europea.

Besteiro esixiu que se cumpran todos os controis medioambientais, pero considerou viábel o proxecto de Doade desde o punto de vista económico, destacando a súa importancia para sectores clave en Galicia como a automoción, o naval ou o tecnolóxico.

Sinalou ademais que o impacto social da mina en xeración de emprego tamén a diferencia do proxecto de Altri, que non cumpre os criterios para recibir axudas públicas. Fronte á postura do PP e do BNG, o PSdeG mantén unha posición coherente desde o inicio: “non existen razóns fundadas para conceder legalmente esas axudas”.