Besteiro presenta 40 propostas para dar resposta aos problemas reais dos galegos e das galegas fronte a un Rueda sen solucións
O voceiro do Grupo Parlamentario Socialista, José Ramón Gómez Besteiro, presentou esta mañá as 40 propostas de resolución que o PSdeG defenderá no Debate sobre o Estado da Autonomía. Besteiro salientou que os socialistas achegan máis iniciativas que o propio presidente da Xunta, Alfonso Rueda, a quen acusou de estar "desconectado da realidade" e dos problemas que perciben os galegos e galegas.
As propostas socialistas estrutúranse en dous grandes bloques. O primeiro céntrase na economía, o emprego e o modelo produtivo, con medidas como un Plan de Primeira Oportunidade para a mocidade cun investimento de 100 millóns de euros para 10.000 beneficiarios, e unha aposta decidida polas enerxías renovables, o biometano, o hidróxeno e o impulso ao I+D+i ata o 3% do orzamento en 2030.
O segundo bloque aborda a calidade de vida e os servizos públicos, cun Banco Público da Alugueiro para mobilizar 5.000 vivendas baleiras, a construción de nova vivenda pública, e propostas para garantir atención primaria en 48 horas, mellorar a saúde mental e reducir listas de espera.
Besteiro tamén reclamou a condonación da débeda autonómica como primeira fase para un novo modelo de financiamento que teña en conta a dispersión e o envellecemento da poboación. Criticou as bonificacións fiscais ao patrimonio promovidas polo PP, sinalando a falta de coherencia no discurso financeiro da Xunta.
En materia de autogoberno, instou a asumir plenamente as competencias xa transferidas, como sanidade ou vivenda, antes de reclamar novas. Besteiro reivindicou un modelo de política baseado en propostas realizables e no diálogo, e puxo o foco na defensa da memoria democrática e o compromiso internacional de Galicia con Gaza, Ucraína e a idea dunha Europa solidaria.