Besteiro reclamaralle a Rueda que abandone o “non” á condonación da débeda que lle ordena Feijóo en contra dos intereses de Galicia
Santiago de Compostela, 4 de marzo de 2025. O portavoz do Grupo Socialista, José Ramón Gómez Besteiro, esixiralle a Rueda que “dea un paso” para abandonar a posición do “non” á condonación de 4.010 millóns de euros de débeda imposta por Génova, e acepte unha medida positiva para os galegos e as galegas. A viceportavoz do Grupo Socialista, Elena Espinosa, explicou logo da Xunta de Portavoces do Parlamento que Besteiro centrará a sesión de control do próximo Pleno na situación financeira de Galicia.
Espinosa subliñou que Rueda está a prexudicar a Galicia ao rexeitar unha condonación da débeda que permitiría liberar recursos para sanidade, educación, dependencia e transporte. Reclamou ao PP que “poñan a cabeza no que teñen que poñela” e que pensen menos nas ordes de Génova e máis nos intereses dos galegos e galegas.
A responsable socialista defendeu o criterio poboacional empregado polo Goberno central para o reparto da condonación da débeda, considerando que é unha medida xusta para Galicia e o conxunto das comunidades autónomas. Por este motivo, instou ao presidente da Xunta a aceptar a condonación antes de abrir o debate sobre o financiamento galego.
Reforzo do persoal sanitario ante as agresións en urxencias
A portavoz de Sanidade, Elena Espinosa, tamén anunciou que os socialistas levarán ao próximo Pleno unha pregunta oral sobre o incremento das agresións ao persoal sanitario. Espinosa mantivo hoxe mesmo un encontro con representantes do servizo de Urxencias do CHUAC (Complexo Hospitalario Universitario da Coruña) e criticou que a Xunta siga sen escoitar o persoal afectado nin ofrecer solucións.
Reclamou que a Xunta vaia á raíz do problema e reforce o persoal sanitario para reducir as esperas e mellorar a atención. “Non se pode ignorar a situación crítica que se está a vivir nos hospitais galegos”, advertiu.
Vivenda: reforzo do Bono Alugueiro Mozo e zonas tensionadas
O Grupo Socialista tamén interpelará á conselleira de Vivenda para reclamarlle que exerza as súas competencias e dedique recursos propios para reforzar o Bono Alugueiro Mozo, que actualmente está financiado case na súa totalidade con fondos estatais.
Espinosa lembrou que dos 13 millóns de euros anunciados pola Xunta, 11,4 millóns proveñen do Estado, mentres que só 1,6 millóns corresponden a remanentes de anos anteriores. Denunciou que a Xunta non está a facer nada por axudar aos mozos e mozas na procura dunha vivenda, ao tempo que bloquea a declaración de zonas tensionadas para regular os prezos.
Ademais, sinalou que o goberno galego deixou sen executar o 90% do programa de acceso á vivenda no terceiro trimestre de 2024, acumulando 270 millóns de euros sen gastar en vivenda desde 2009.
Plan de choque para eliminar a fenda salarial e garantir a igualdade
O PSdeG tamén levará ao Pleno dúas proposicións non de Lei en materia de igualdade. A primeira reclamará un Plan de Choque para eliminar a fenda salarial e o teito de cristal das mulleres galegas.
Hoxe en día, só 3 de cada 10 directores ou xerentes en Galicia son mulleres. Ademais, as traballadoras galegas cobran unha media de 20.840 euros anuais fronte aos 25.527 dos homes, e un 2% menos que as mulleres no resto do Estado.
A segunda proposición incluirá medidas para avanzar na igualdade real e combater a violencia machista, con accións como:
- Formación en igualdade para todo o persoal dos poderes públicos.
- Intensificación de campañas e programas de concienciación social.
- Garantía de protocolos de detección actualizados para profesionais da educación, sanidade, corpos de seguridade, xustiza e o ámbito laboral e social.
Xabaril: medidas urxentes ante o impacto da súa expansión
Finalmente, o Grupo Socialista presentará unha pregunta oral ao conselleiro do Medio Rural sobre as medidas tomadas para avaliar o impacto da expansión do xabaril en Galicia. Espinosa instou á Xunta a facer uso das súas competencias para frear os danos que esta especie está a causar na agricultura e nos ecosistemas galegos.