Besteiro resume o ano de Rueda: “Sen proxecto e sen respostas”
O secretario xeral do PSdeG, José Ramón Gómez Besteiro, fixo este domingo balance do primeiro aniversario da investidura de Alfonso Rueda como presidente da Xunta de Galicia. “Un ano perdido para Galicia, sen avances nin respostas aos problemas reais da cidadanía”, asegurou.
Besteiro lembrou que, malia cumprir un ano ao fronte do Goberno galego, Rueda leva moito máis tempo con responsabilidades: “Non debemos esquecer que os dezaseis anos anteriores das políticas erradas do Partido Popular tamén levan a súa marca, tamén tivo responsabilidades”.
Para o líder socialista, Galicia atópase “sen liderado nin proxecto claro”, cun presidente “máis preocupado pola súa imaxe que pola xestión” e que ignora os principais problemas da sociedade. Sinalou como exemplos a crise da sanidade pública —“colapsada”— e as dificultades para acceder a unha vivenda, especialmente para a mocidade, “reflexo do fracaso nas prioridades sociais”.
Cuestionou tamén o modelo de país que defende o PP, centrado en “unha macrocelulosa en Palas de Rei que Galicia non necesita, cunha viabilidade dubidosa e forte contestación social”. Fronte a isto, reclamou “un modelo de futuro, non promesas valeiras”.
Besteiro denunciou ademais a “tibieza” de Rueda ante a crise dos aranceis e lembrou que, pese a ofrecer cooperación e solicitar unha reunión para abordar conxuntamente esta situación, o presidente da Xunta “rexeitou tender pontes”. “Prefire non facer nada antes que sentarse a falar”, criticou.
Concluíu asegurando que Galicia non pode seguir atrapada na inercia: “Reclamamos unha alternativa seria, con proxecto, centrada nas necesidades reais da xente: reforzo dos servizos públicos, acceso á vivenda, benestar social e un modelo de desenvolvemento sostible”.