Besteiro visita a UVigo e reclama máis financiamento para a universidade pública
O secretario xeral do PSdeG, José Ramón Gómez Besteiro, reuniuse este luns coa reitora da Universidade de Vigo, Carmen García Mateo, na primeira toma de contacto do socialista galego coa nova responsable da institución, a primeira muller que ocupa o Reitorado na historia da UVigo. Besteiro agradeceulle que os recibise “apenas recén chegada” ao cargo e resumiu o encontro nunha soa idea: “O apoio decidido á universidade pública. Esa é a nosa prioridade e non temos por que agochar que o noso interese político é precisamente ese”.
Fronte á educación privada, “que respectamos porque a ampara a propia lexislación”, o dirixente socialista deixou claro que o PSdeG está “volcado en potenciar, mellorar e dimensionar máis e mellor a universidade pública”. E aí situou o momento decisivo que vén: a renegociación do financiamento.
Besteiro anunciou que os socialistas trasladarán á negociación do financiamento autonómico a petición de que a Xunta aumente a achega ás universidades “no eido estrutural, que é onde máis a necesitan”. A economía galega está medrando e a comunidade vai recibir máis ingresos, lembrou. Pois ben: “Ese aumento ten que traducirse nun reparto xusto coa universidade pública”.
O líder do PSdeG fixo súa tamén a aposta da reitora por reequilibrar os campus de Vigo, Ourense e Pontevedra, de xeito que as necesidades das tres sedes queden atendidas en igualdade de condicións.
No capítulo de vivenda, Besteiro comprometeu o traballo do seu partido na demanda de máis residencias públicas e explorar “novas fórmulas para que os estudantes teñan facilidades de aloxamento durante os seus períodos de estudo”. Unha reivindicación que enlaza coa axenda socialista en materia de vivenda e que afecta de cheo aos tres campus.
Reclamou ademais á Xunta un paso que os socialistas galegos veñen defendendo desde hai tempo: a gratuidade da primeira matrícula nos mestrados. “Facilitaríalle a vida a moitos rapaces e rapazas que queren cursar eses estudos pero teñen dificultades económicas. Priorizar a quen máis o necesita é para nós un valor político”, subliñou.
Besteiro pechou o encontro enmarcando a defensa da universidade pública na defensa do público en xeral, co exemplo da sanidade: “A sanidade pública é a que ampara a todos e a que presta mellores servizos, sen preguntar se temos moito ou pouco. Iso é o que nos une e o que nos ampara, tamén no eido da educación”.
Preguntado polos xornalistas pola final do Mundial, Besteiro non ocultou a súa alegría pola vitoria de España. “Claro que a vin, como non? Foi un día moi alegre e todos nos contaxiamos desa alegría antes, durante e despois do partido”, sinalou. A final trouxolle á memoria a de hai dezaseis anos, cando España gañou o Mundial de Sudáfrica: “Na praza da catedral, en Lugo, cunha pantalla xigante e moitísima xente, moita xente moza. Alí estabamos todos coma un”.
A reunión coa reitora foi a última cita da axenda de Besteiro en Galicia antes de emprender este martes a súa visita a Arxentina e Uruguai, unha semana de axenda política, institucional e social con encontros con colectivos da Galicia exterior e coas forzas progresistas de ambos os países. Entre os asuntos que levará na maleta está a aplicación da Lei de Netos: “Son dereitos adquiridos pola Lei de Memoria Democrática. Os que defendemos a memoria democrática defendemos a aplicación desta lei con total virtualidade”.
O acordo entre a Unión Europea e o Mercosur ocupará tamén boa parte das conversas. Besteiro considérao moi positivo e beneficioso “globalmente para Galicia e tamén para os países latinoamericanos” que manteñen relacións comerciais coa comunidade, aínda que admite que hai aspectos que seguir de preto, como os controis sobre determinados produtos. A clave, ao seu xuízo, está nas exportacións: “A mellora da situación económica en Galicia depende tamén de mellorar nas exportacións, e aí Mercosur vainos axudar, sobre todo cando determinados mercados, como o norteamericano, poñen especiais dificultades ás relacións comerciais. Hai que buscar mercados alternativos”. E resumiu o espírito da viaxe: “Falaremos cos colectivos sociais, falaremos de dereitos, pero falaremos tamén de economía, como non pode ser doutra maneira”.