Actualidade

Ana Miranda anuncia en Bruxelas unhas xornadas os días 11 e 12 de xuño para trasladar ao Parlamento Europeo a falta de vivenda asequible, o crecemento do alugueiro, as vivendas turísticas e outras particularidades galegas, coa concelleira da Coruña Avia Veira como relatora.

A eurodeputada do BNG Ana Miranda presentou esta mañá en reunión na Coruña –xunto a Avia Veira, concelleira do Bloque– a coorganización dunha mesa de traballo sobre o acceso á vivenda en Galiza, que terá lugar os días 11 e 12 de xuño no Parlamento Europeo.

“Galiza é un dos territorios europeos con menos cidades de máis de medio millón de habitantes, e sen embargo padece problemas semellantes aos dos grandes núcleos: vivendas baleiras, alugueiros disparados, alto número de pisos turísticos e falta de políticas de vivenda pública”, explicou Miranda. A eurodeputada subliñou que, por primeira vez, o Parlamento Europeo creou unha Comisión de vivenda asequible co mandato de elaborar un informe final coas principais demandas de cada rexión.

Entre os temas que se abordarán figurará a falta de vivenda protexida, as barreiras que teñen especialmente os mozos para emanciparse, o aumento das vivendas de uso turístico e a ausencia de apoio autonómico, competencias exclusivas da Xunta. “Queremos levar directamente a voz de Galiza e, concretamente, a voz da Coruña”, engadiu Miranda, “pola iso contaremos con Avia Veira como unha das relatoras, para reflectir en primeira persoa as realidades locais”.

Avia Veira lamentou que o PP descubrira agora que a Xunta é a administración responsable en vivenda e o acusou de “anuncios bluf sen medidas reais”. “Exiximos a mobilización do parque baleiro, priorizar o alugueiro nas construcións públicas e políticas específicas para a mocidade”, subliñou. “Vivir na Coruña está a ser misión imposible: prezos de compra prohibitivos, vivenda protexida escasa e alugueiros que soben por riba do IPC”.