BNG denuncia a inacción da Xunta ante a vaga de lumes e contratos sen executar
O deputado e portavoz de Medio Rural do BNG, Secundino Fernández, acusou á Xunta dun “grao de pasotismo e de inutilidade nunca vistos” na loita contra os incendios forestais, en plena vaga de lumes e con temperaturas extremas.
Fernández denunciou que a Consellería do Medio Rural non puxo en marcha os traballos de xestión de biomasa nas faixas secundarias de protección dos núcleos máis expostos, malia contar cun contrato publicado o pasado 20 de xuño na Plataforma de Contratos Públicos de Galiza por un importe de 2.278.560 euros. Segundo explicou, só dous dos oito lotes foron adxudicados e “non se executou absolutamente nada, cando xa estamos no medio do verán e coa crise incendiaria agravada pola emerxencia climática”.
Ademais, lembrou que esta situación se suma á falta de execución doutros programas de prevención: obras valoradas en 3 millóns de euros e axudas de 5,4 millóns destinadas ás comunidades de montes veciñais, o que supón un total de 8,4 millóns de euros paralizados. “Estamos diante dunha estratexia de abandono que pon en perigo a vida das galegas e galegos que viven no rural”, advertiu.
Fernández responsabilizou directamente á conselleira de Medio Rural, María José Gómez, e ao presidente Alfonso Rueda de “xogar coa seguridade do país por pura incompetencia”. “A realidade é que temos unha Xunta que non actúa e que deixa á intemperie á nosa xente fronte á lacra dos incendios”, concluíu.