Actualidade

As tres formacións rexistran emendas para prohibir por lei desafiuzamentos e cortes de subministración a persoas vulnerables, con discapacidade ou en situación de dependencia.

As formacións BNG, ERC e EH Bildu rexistraron emendas conxuntas para incorporar o denominado Escudo Social á Lei de Dependencia co obxectivo de blindar por lei a prohibición de desafiuzamentos e de interrupcións de subministracións básicas a persoas vulnerables.

As tres formacións buscan garantir o carácter estrutural destas medidas despois de que o Real Decreto-lei que as recollía non fose validado no pleno do Congreso dos Deputados.

As emendas preséntanse no marco do debate do proxecto de lei que modifica o texto refundido da Lei Xeral de Dereitos das Persoas con Discapacidade e a Lei 39/2006 de Promoción da Autonomía Persoal e Atención ás Persoas en Situación de Dependencia, co obxectivo de reforzar os dereitos á inclusión, á autonomía e á accesibilidade universal conforme ao artigo 49 da Constitución.

BNG, ERC e EH Bildu consideran “fundamentais para milleiros de familias” as medidas do Escudo Social e propoñen incorporar á lei a prohibición de desafiuzamentos cando na vivenda residan menores de idade, persoas en situación de dependencia ou persoas vulnerables, así como impedir cortes de subministracións básicas nestes casos para garantir a continuidade dos servizos esenciais.

As formacións tamén defenden incrementar a reserva de vivendas adaptadas para persoas con discapacidade nos proxectos de vivenda protexida, pasando do 4 % proposto polo Goberno ao 7 %, co fin de asegurar condicións de accesibilidade e deseño universal.

Por último, as tres organizacións inclúen unha emenda para reclamar o respecto ás competencias propias das comunidades autónomas.