Actualidade

A eurodeputada Ana Miranda solicita que a Eurocámara aborde en setembro a situación dos incendios en Galiza e reclama que comisarios europeos visiten as zonas afectadas, con preto de 100.000 hectáreas queimadas este verán.

Diante da grave situación que atravesa Galiza por mor dos incendios forestais, a eurodeputada do BNG, Ana Miranda, vén de solicitar —a través do grupo Verdes-ALE— a inclusión dun debate específico sobre os lumes no pleno do Parlamento Europeo que terá lugar entre o 8 e o 12 de setembro en Estrasburgo.

Miranda considera prioritario que representantes da Comisión Europea visiten as zonas máis afectadas. Por iso, remitiu cartas ao Comisario de Agricultura, Christophe Hansen, e á Comisaria de Igualdade, Prontitude e Xestión de Crises, Hadja Lahbib, pedíndolles unha visita a Galiza, dada a magnitude dos lumes, que xa arrasaron preto de 100.000 hectáreas desde o inicio do verán, superando a superficie queimada en 2006.

A eurodeputada galega salientou que tanto no debate plenario como nos encontros cos comisarios debe abordarse a falta de prevención e as deficiencias nas estratexias de resposta. Lembrou que os incendios afectaron gravemente ás comunidades rurais, destruíndo casas, granxas e gando, e danando sectores como a agricultura e a viticultura.

Miranda puxo o foco na xestión ineficaz do persoal de extinción, que traballa con fondos e recursos insuficientes, en condicións de temporalidade e apenas percibindo o salario mínimo. “Este modelo de emprego precario prexudica a eficacia e a seguridade dos nosos esforzos de extinción de incendios”, advertiu.

A eurodeputada subliñou que estas son as primeiras accións que o BNG promove na Eurocámara en relación cos incendios en Galiza, dentro dunha “ofensiva global” en todas as institucións. Xa en xullo, Miranda alertara en Estrasburgo do risco de lumes, agravado pola ineficacia da xestión da Xunta e pola súa aposta por modelos forestais baseados no eucalipto.