Caballero celebra o apoio da RFEF á candidatura de Vigo para o Mundial 2030 pero denuncia dous anos de atraso
O alcalde de Vigo, Abel Caballero, cualificou como “unha gran noticia” que a Real Federación Española de Fútbol vaia trasladar á FIFA a candidatura da cidade olívica como sede do Mundial 2030. Con todo, advertiu de que Vigo chega a este proceso “con case dous anos de atraso” respecto doutras cidades aspirantes.
O rexedor sinalou que, polo momento, toda a información coñecida procede dos medios de comunicación, polo que reclamou á Federación que se dirixa “de forma inmediata e oficial” ao Concello para confirmar a candidatura e definir unha folla de ruta clara. “Urxe unha reunión para coñecer protocolos e actuacións, porque ata agora non nos comunicaron nada”, afirmou.
A pesar deste atraso, Caballero amosouse convencido de que Vigo conta cun “proxecto imbatible” e está en condicións de cumprir cos requisitos esixidos pola FIFA. Neste sentido, destacou o avance das obras no Estadio Municipal de Balaídos, especialmente na grada de Gol, que segundo indicou “vai incluso máis rápido do previsto”.
Ademais, anunciou que en breve comezará o traslado do colector situado diante da grada de Tribuna, cun investimento aproximado de 3,5 millóns de euros, unha actuación previa necesaria para a execución definitiva da nova bancada.
O alcalde lamentou que a candidatura viguesa non fose impulsada antes pola Real Federación Española de Fútbol, xa que iso permitiría adiantar parte das actuacións previstas. “Se o comunicasen desde o principio, xa teriamos parte do camiño feito”, apuntou.
Caballero tamén criticou a falta de implicación doutras administracións, como a Xunta de Galicia e a Deputación, no financiamento dalgunhas intervencións clave para a candidatura.
Pola contra, agradeceu expresamente o apoio do Goberno de España, e en particular da ministra Milagros Tolón e do Consello Superior de Deportes, que segundo lembrou xa defenderan previamente a candidatura de Vigo.
O rexedor concluíu destacando o valor histórico desta posible designación: “Vigo será unha cidade bimundialista”. A cidade xa acolleu partidos no Mundial de 1982 e aspira agora a repetir experiencia no Mundial 2030.