Case 16.000 aspirantes comezan as oposicións de Educación en Galicia para 1.601 prazas
As oposicións de Educación en Galicia xa están en marcha, cun total de case 15.900 aspirantes que se presentan ás probas convocadas para cubrir 1.601 prazas no sistema educativo galego.
O conselleiro de Educación, Ciencia, Universidades e FP, Román Rodríguez, acompañado polo director xeral de Centros e Recursos Humanos, Jesús Álvarez, visitou algunhas das sedes das probas no Centro Integrado de FP Politécnico de Santiago e no Instituto Ramón Aller Ulloa de Lalín, onde trasladou ánimos ás persoas opositoras.
Rodríguez destacou que o esforzo realizado nos últimos meses debe agora materializarse no exame, subliñando que é o momento de demostrar o traballo desenvolvido e recoller os seus froitos.
As probas mobilizan este ano 154 tribunais, formados por 2.156 persoas entre titulares e suplentes, repartidos en 60 centros educativos de 15 localidades das catro provincias galegas.
O conselleiro agradeceu o labor de todo o persoal implicado na organización do proceso, que leva meses traballando para garantir o seu correcto desenvolvemento e todas as garantías. Como novidade, este ano realizaranse controis aleatorios de dispositivos non permitidos co obxectivo de asegurar a igualdade de oportunidades.
Outra das novidades é o acordo acadado cos sindicatos CCOO, ANPE, UGT e CSIF para eliminar a obriga de que o persoal interino e substituto teña que presentarse ás oposicións para manter a súa posición nas listas, o que contribúe a simplificar o proceso e mellorar a organización dos tribunais. En todo caso, o persoal interino que o desexe puido presentarse ás probas.
Román Rodríguez salientou tamén a axilidade do proceso, prevendo que os exames e os resultados estean dispoñibles a partir do 19 de xullo. A continuación, as persoas que obteñan praza deberán participar no concurso de adxudicación de destinos provisionais, que se resolverá a comezos de agosto, co obxectivo de que o novo profesorado se incorpore aos centros o 1 de setembro.
O conselleiro destacou que estas oposicións forman parte da aposta da Xunta pola estabilidade do emprego docente e pola mellora do sistema educativo, lembrando que desde 2009 se teñen convocado 21.698 prazas no sistema educativo galego.
Segundo indicou, Galicia conta ademais coa menor taxa de interinidade docente do Estado, moi por debaixo da media, e mantén a convocatoria do máximo número de prazas posible, esgotando a taxa de reposición do 120%, é dicir, 120 prazas por cada 100 baixas.
As oposicións contribúen tamén á mellora progresiva das ratios, reducindo o número de alumnos por docente nun contexto de caída da matrícula.
En total, das 1.601 prazas convocadas en 42 especialidades, 1.388 corresponden a novo ingreso e 213 a promoción interna. Por corpos, ofértanse 476 prazas para mestres, 852 para profesores de ensino secundario e 60 para profesores especialistas en sectores singulares da FP.
A convocatoria inclúe tamén o reforzo de áreas clave como a atención á diversidade, con 136 prazas en Audición e Linguaxe e Pedagoxía Terapéutica, e as linguas estranxeiras, con 229 prazas de inglés e 54 de francés. Tamén se inclúen especialidades con alta demanda como Latín en Secundaria e Soldadura na FP.