CC. OO. Ensino presenta unha candidatura de 912 docentes para converterse na referencia sindical

CCOO Ensino presenta as súas candidaturas ás eleccións sindicais do persoal docente do ensino público non universitario, que terán lugar o próximo 3 de decembro, cun total de 912 persoas nas catro provincias galegas. O sindicato concorre aos comicios coa aspiración de converterse na referencia sindical do ensino público galego e reforzar a súa capacidade de representación e negociación.
As candidaturas reúnen profesorado de todas as etapas educativas e de diferentes tipos de centros, tanto das cidades como do rural. En total, están vinculadas a arredor de 480 centros educativos situados en 186 concellos galegos. Segundo a organización, todas as persoas integrantes comparten o compromiso coa defensa do ensino público e coa mellora das condicións laborais do profesorado.
Por provincias, a candidatura da Coruña está integrada por 292 persoas e encabezada por Noelia Sánchez Vaamonde, profesora de Lingua Castelá e Literatura e secretaria xeral de CCOO Ensino. En Lugo, a lista reúne 112 persoas e está liderada por Alberto Caldeiro Pérez, profesor de Operacións e Procesos de Produción Agraria. A candidatura de Ourense conta con 304 integrantes e está encabezada por Borja Campos Seijo, profesor de Xeografía e Historia, mentres que en Pontevedra a lista está formada por 204 persoas e liderada por Montserrat Coello Rodríguez, mestra de Educación Física.
As mulleres representan o 77,1 % das candidaturas, cun total de 703 das 912 persoas integrantes. O sindicato destaca esta presenza como unha mostra da súa aposta pola participación e o liderado feminino na representación do profesorado e na defensa dun ensino público comprometido coa igualdade.
CCOO Ensino afronta estas eleccións coa intención de consolidar a liña ascendente dos seus resultados durante a última década e reivindica un modelo de acción sindical baseado na mobilización, a negociación e a actuación xurídica para transformar as demandas do profesorado en melloras reais.
A organización lembra que o resultado electoral determinará a representación nas xuntas de persoal e a capacidade das distintas organizacións sindicais para participar nas mesas de negociación, tanto no ámbito galego como no estatal. Neses espazos abórdanse cuestións que afectan directamente ao día a día dos centros educativos, como os horarios, as retribucións, os permisos, o emprego, as ratios ou a atención á diversidade.
Un modelo sindical baseado na negociación e na mobilización
O sindicato defende unha acción sindical que parte da escoita nos centros educativos e do coñecemento dos problemas do profesorado. Neste sentido, destaca a celebración de máis de 10.000 asembleas nos últimos catro anos e a utilización de diferentes ferramentas para conseguir solucións, desde a mobilización ata a negociación e a vía xudicial cando resulta necesaria.
CCOO Ensino contrapón este modelo ao que cualifica de confrontación permanente e lembra que, desde 2008, outras organizacións non asinaron acordos coa Consellería de Educación. Pola súa banda, reivindica a súa participación en negociacións que permitiron converter reivindicacións históricas en melloras para o profesorado.
Entre os avances que destaca figuran a recuperación íntegra da parte galega das pagas extraordinarias, o cobro completo desde o primeiro día de baixa, a homologación retributiva co resto das comunidades autónomas e outras melloras salariais. Tamén sinala a redución das ratios e o cómputo dobre ou triplo de determinado alumnado para estes efectos.
Nos últimos anos, segundo o sindicato, tamén se avanzou na redución do horario lectivo, coa consecución das 23 horas en Infantil e Primaria e a recuperación das 18 sesións lectivas en Secundaria, Bacharelato, Formación Profesional e ensinanzas de réxime especial.
A estas medidas súmanse melloras na atención á diversidade, cun incremento das dotacións de profesorado de Pedagoxía Terapéutica, Audición e Linguaxe e Orientación, así como un maior recoñecemento das titorías, coordinacións e funcións directivas.
A organización tamén destaca os avances en materia de conciliación para o persoal interino e substituto, a eliminación da obriga de presentarse ás oposicións para manterse nas listas de substitucións e o traballo que se está a desenvolver para implantar un sistema de chamamentos máis moderno e eficaz mediante unha aplicación web.
O sindicato considera que estes avances son froito do traballo colectivo, da presión sindical e da negociación, pero insiste en que os acordos non son un punto final, senón que é necesario vixiar o seu cumprimento e continuar traballando para melloralos.
Un programa electoral con propostas para os vindeiros catro anos
CCOO Ensino presenta tamén un programa electoral que recolle as demandas trasladadas polo profesorado e establece as principais reivindicacións para os próximos catro anos.
Entre as prioridades figura a mellora das retribucións e a recuperación do poder adquisitivo, mediante unha cláusula salarial vinculada ao IPC real, a recuperación das cantidades pendentes das pagas extraordinarias na súa parte estatal e a inclusión de todos os corpos docentes no subgrupo A1.
No ámbito da xornada laboral, a organización propón recuperar as 21 horas lectivas para mestras e mestres, reducir progresivamente a carga lectiva e implantar unha xornada máxima real de 35 horas semanais.
O programa tamén contempla medidas para mellorar a conciliación e a saúde laboral, como a redución da xornada sen perda retributiva para o profesorado maior de 55 anos, a ampliación dos permisos e a remuneración íntegra das oito semanas do permiso parental.
Para o persoal interino e substituto, reclama recuperar o pagamento do verán para quen acumule máis de cinco meses e medio de servizos durante o curso escolar, ademais de garantir a cobertura de todas as vacantes e substitucións.
Outra das liñas prioritarias é reforzar a atención á diversidade e reducir as ratios, cun incremento do profesorado de Pedagoxía Terapéutica e Audición e Linguaxe, unha rede de orientación reforzada e unha dotación mínima dunha persoa profesional da orientación por cada 250 alumnos e alumnas.
A redución da burocracia, mediante a simplificación de procedementos, a eliminación de duplicidades e a garantía de tempo ou persoal administrativo suficiente para as tarefas de xestión, é outra das propostas incluídas no programa.
CCOO Ensino tamén aposta por avanzar nos dereitos de xubilación, desenvolvendo a xubilación parcial con contrato de relevo para o persoal funcionario, sen perda de dereitos retributivos nin de cotización.
Finalmente, a organización inclúe entre as súas reivindicacións a defensa e promoción da lingua galega no ensino, coa elaboración dunha nova normativa de consenso e medidas de acción positiva que garantan a súa presenza efectiva nas diferentes etapas e ensinanzas.
CCOO Ensino afronta así as eleccións sindicais do 3 de decembro coa experiencia dos avances conseguidos e coa vontade de continuar mellorando as condicións laborais do profesorado. O sindicato considera que cada voto será determinante para reforzar a defensa das demandas dos centros educativos nos próximos catro anos.