CCOO advirte de que Ence estará «abocada ao peche» se non se executan os investimentos do Plan Avanza
O comité de empresa de Ence, presidido por CCOO, aproveitou este venres a visita da conselleira de Medio Ambiente e Cambio Climático, Ángeles Vázquez, á biofábrica de Pontevedra para reclamar garantías sobre o futuro industrial da planta e esixir que se executen os investimentos comprometidos no marco do Plan Avanza. O sindicato advirte de que, de non materializarse estas actuacións, a fábrica estará «abocada ao peche».
O comité concentrouse con motivo da visita da conselleira, que se desprazou á planta para coñecer os proxectos relacionados coa mellora da eficiencia no aproveitamento dos recursos hídricos e, en particular, o proxecto piloto para a recuperación de augas residuais procedentes da EDAR dos Praceres.
Para a representación dos traballadores, a recuperación destas augas constitúe un «fito tecnolóxico» e unha «iniciativa sen precedentes» na industria da pasta de papel. O comité agradeceu o traballo desenvolvido polo persoal implicado no proxecto, que permitiu avanzar na súa posta en marcha e contribuíu ao mantemento da actividade da fábrica.
Porén, CCOO considera que este avance debe ir acompañado da execución dos investimentos previstos no Plan Avanza, que leva anos reclamando. O sindicato entende que estas actuacións son «imprescindibles» para modernizar as instalacións, reforzar a competitividade da planta e garantir o seu futuro industrial.
«Levamos moitos anos esperando por un plan que permitiría converter a fábrica de Pontevedra nun referente industrial, garantindo o seu futuro e a xeración de emprego na comarca», subliñou o delegado de CCOO e presidente do comité de empresa, Santiago Cerqueiro.
O representante sindical advertiu de que a falta de investimentos pode comprometer a continuidade da actividade. «Se seguimos sen executar os investimentos comprometidos, deixaremos de ser competitivos e estaremos abocados ao peche», asegurou.
O comité reclamou tanto á dirección de Ence como á Xunta de Galicia que actúen «con responsabilidade» e impulsen as medidas necesarias para garantir o futuro industrial da fábrica, manter os postos de traballo e preservar a actividade económica vinculada á planta na comarca de Pontevedra.
VISITA DA CONSELLEIRA DE MEDIO AMBIENTE
Pola súa banda, a conselleira de Medio Ambiente e Cambio Climático, Ángeles Vázquez, animou o tecido industrial galego a apostar pola reutilización da auga nos procesos produtivos para reducir a súa pegada ambiental e contribuír a garantir o abastecemento. Durante a súa visita á biofábrica, destacou que esta é unha das liñas de actuación da Xunta para mellorar a eficiencia no uso dos recursos hídricos.
Vázquez explicou que, segundo os datos preliminares dispoñibles, en Galicia poderían reutilizarse máis de cinco millóns de metros cúbicos de auga ao ano no ámbito industrial, para usos como o rego ou o baldeo. Neste sentido, sinalou que Augas de Galicia está a elaborar unha folla de ruta de reutilización dos recursos hídricos no marco dos traballos previos ao novo Plan xeral galego de abastecemento.
O obxectivo é analizar as estacións depuradoras, os tratamentos dispoñibles e as posibles demandas existentes ao seu redor para determinar en que ámbitos a reutilización da auga resulta técnica, sanitaria, ambiental e economicamente viable.
A conselleira puxo como exemplo a propia biofábrica de Ence en Pontevedra, que desde 2024 conta cun sistema de recirculación de auga da súa estación depuradora. Segundo indicou, esta medida permitiu reducir en máis dun 60% o consumo de auga procedente do río Lérez respecto dos datos de 2017.
Ademais, a empresa está a ultimar un proxecto piloto para rexenerar augas residuais procedentes da EDAR dos Praceres, depuralas na propia biofábrica e reutilizalas posteriormente no proceso produtivo. A iniciativa permitiría reducir aínda máis o consumo de auga e os vertidos de auga depurada ao mar.
O proxecto, cuxa autorización tramita a Consellería, atópase actualmente en fase de probas e, segundo a Xunta, coa súa posta en marcha Ence podería chegar mesmo a deixar de consumir auga do río Lérez.
Vázquez lembrou, porén, que a captación industrial concedida a Ence no Lérez está condicionada á dispoñibilidade de recursos. Así, cando o río só dispoña de auga suficiente para garantir o caudal ecolóxico e o funcionamento do ecosistema fluvial, a empresa deberá deter a extracción destinada á planta.
A conselleira explicou tamén que a reutilización da auga será unha das principais liñas de traballo do novo Plan estratéxico para o reforzo da eficiencia e da garantía do abastecemento de Galicia (Perega), actualmente en elaboración e que servirá de base para o futuro Plan de abastecemento. O obxectivo, segundo indicou, é que a reutilización pase de ser «unha solución puntual a formar parte das solucións estruturais» para garantir os subministracións básicos e prioritarios en Galicia.