Actualidade

O sindicato chama a tres xornadas de paro en Renfe, Iryo, Ouigo e Serveo para reclamar máis persoal, fin das externalizacións e melloras en seguridade tras varios sinistros con vítimas.

O sector ferroviario da CCOO convocou unha folga de tres días —9, 10 e 11 de febreiro— en defensa do ferrocarril público e da seguridade laboral tras os graves accidentes ferroviarios rexistrados nas últimas datas, algúns deles con resultado de persoas falecidas e feridas.

Os paros afectarán ao Grupo Renfe, así como aos operadores privados Iryo e Ouigo, ademais da empresa Serveo Servicios a bordo.

Segundo explica CCOO, os sucesos recentes puxeron de manifesto problemas estruturais no sistema ferroviario que o sindicato vén denunciando desde hai tempo, entre eles a falta de persoal en todos os ámbitos de Renfe, que provoca sobrecargas de traballo e limita a capacidade de resposta ante incidencias complexas.

A organización sindical sinala tamén a externalización de actividades propias do ferrocarril, que deberían ser realizadas con persoal propio, formado e cunha planificación acorde ao volume real de actividade. Esta situación, engaden, agrava os problemas de coordinación en situacións de emerxencia e xera inseguridade operativa.

Outro dos aspectos denunciados é o deterioro do clima laboral, con ataques á profesionalidade das persoas traballadoras, como a filtración de audios internos procedentes de centros de xestión, feitos que CCOO considera “un atentado contra o persoal e contra a confianza necesaria para unha xestión responsable do sistema ferroviario”.

O sindicato esixe solucións reais, inmediatas e verificables, co obxectivo de garantir condicións de traballo dignas, a saúde e a integridade do persoal, así como un ferrocarril público con medios humanos suficientes e xestión directa das actividades esenciais.

CCOO reclama tamén un acordo global que afecte a todos os colectivos do sector, desde operacións e mantemento ata circulación e atención a bordo, ao considerar que os problemas actuais son transversais.

No ámbito da prevención, a organización aposta por protocolos específicos fronte a fenómenos ambientais extremos, como o xa acordado en Cataluña, e demanda a súa extensión a todo o Estado.

Ademais, o sindicato lembra que o mantemento ferroviario debe ser público, tanto na infraestrutura —competencia de Adif— como no material rodante de Renfe.

Como paso previo á folga, o vindeiro 3 de febreiro celebrarase unha concentración diante do Ministerio de Transportes, convocada conxuntamente polos comités xerais de empresa de Renfe e Adif, para esixir responsabilidades e medidas concretas.