CCOO critica como «grave irresponsabilidade» non protexer ás nenas e nenos estranxeiros desamparados
O Sindicato Nacional de Comisións Obreiras de Galicia cualifica como unha «grave irresponsabilidade» non protexer ás nenas e nenos estranxeiros que chegan en situación de desamparo. A central sindical critica con dureza a postura expresada pola conselleira de Política Social, Fabiola García, quen afirmou que Galicia non ten capacidade para acoller máis menores.
«Este discurso non só esquece que a protección da infancia é unha obriga legal e ética, senón que transmite unha mensaxe perigosa: que existen menores de primeira e de segunda segundo a súa orixe», denunciou a secretaria de Organización e Políticas Públicas de CCOO, Maica Bouza.
A sindicalista lembrou que existe un financiamento específico do Estado para atender a estes menores e que a negativa da Xunta «evidencia máis unha falta de vontade política ca unha imposibilidade real».
CCOO recorda que o ordenamento xurídico español e internacional recoñece o deber dos poderes públicos de garantir a protección da infancia. «As nenas e nenos estranxeiros que chegan sen proxenitores nin núcleo familiar son, antes de nada, menores de idade, polo tanto suxeitos da máxima protección», subliñou Bouza.
A responsable sindical tamén afeou a «demagoxia irresponsable» do PP, que —ao seu xuízo— utiliza a situación destes menores como arma política contra o Goberno central. Para CCOO, ademais dunha cuestión legal, trátase dunha «cuestión de solidariedade territorial» dentro de España, comparable á que se demanda na Unión Europea respecto á repartición de persoas migrantes entre os estados membros.
Finalmente, Bouza reclamou que a repartición destes menores sexa considerada «unha cuestión de Estado» e se resolva con normalidade, afastando un tema «tan sensible» da confrontación partidista.