CCOO participa nunha xornada do Consello da Cultura Galega sobre violencia económica
O pazo de Raxoi, en Santiago de Compostela, acolleu este mércores unha nova xornada do ciclo anual Formas de violencia de xénero, organizado polo Consello da Cultura Galega en colaboración co Consello Galego de Relacións Laborais. Nesta edición o tema central foi a violencia económica, analizada desde diferentes perspectivas: laboral, xurídica e social.
O Sindicato Nacional de CCOO participou activamente no encontro, representado por María Barcia, secretaria de Mulleres, Políticas de Igualdade e LGTBIQA+, e Política Social; Iván Cordeiro, secretario xeral da Federación de Servizos; Ángela Junco, secretaria de Igualdade desta federación; e Rebeca Pérez, técnica do Gabinete de Igualdade de CCOO.
Precisamente, Rebeca Pérez interveu na mesa redonda titulada A fenda salarial e negociación colectiva, que se desenvolveu pola tarde, e na que tamén participaron representantes dos sindicatos CIG e UGT, así como da patronal CEG.
O ciclo de xornadas promovido polo Consello da Cultura Galega ten como obxectivo visibilizar e analizar as diferentes formas de violencia de xénero, poñendo o foco nesta ocasión nas manifestacións económicas da desigualdade, como a fenda salarial ou o control financeiro exercido sobre as mulleres.