CCOO salienta a importancia de participar masivamente na folga xeral do 11 de novembro
A secretaria xeral do Sindicato Nacional de CCOO de Galicia, Amelia Pérez, fixo este martes en Vigo un chamamento á participación na folga xeral do vindeiro 11 de novembro para plantarlle cara "aos especuladores, aos rendistas e a quen bloquea a negociación colectiva", co obxectivo de recuperar poder adquisitivo, garantir o acceso á vivenda e mellorar as condicións da clase traballadora.
"O 11N non imos perder salario: imos facer un investimento no futuro do país", afirmou durante unha asemblea celebrada no centro cívico de Teis, que reuniu máis dun cento de delegadas e delegados para organizar o paro. No encontro tamén interviñeron a secretaria xeral da Unión Comarcal de Comisións Obreiras de Vigo, Montserrat Carrera, así como outros representantes da organización sindical e do Sindicato de Inquilinas.
Pérez subliñou que a convocatoria pretende ir máis alá de demostrar a forza da clase traballadora e busca conseguir cambios que permitan avanzar como sociedade. Neste sentido, defendeu a necesidade de situar no centro do debate cuestións que afectan á vida cotiá da cidadanía, como o acceso á vivenda, os salarios, a suba dos prezos, o bloqueo da negociación colectiva, a defensa das pensións e dos servizos públicos e a loita contra a estigmatización das persoas traballadoras que enferman. "Non queremos que se faga caixa á custa do empobrecemento da clase obreira", afirmou.
Durante a súa intervención, a secretaria xeral de CCOO de Galicia tamén puxo o foco nas dificultades das familias para afrontar o encarecemento da vida. Segundo sinalou, as subas salariais que se están a negociar en Galicia roldan o 3,9 %, unha porcentaxe que considera "insuficiente" fronte á evolución dos prezos e ao aumento do custo da vivenda.
Ademais, alertou do encarecemento da cesta da compra e asegurou que as familias galegas gastan un 17 % máis ao mes en alimentación. Esta situación, sostivo, reforza a necesidade de que os salarios "permitan manter unhas condicións de vida dignas".
A folga busca situar os problemas sociais no debate electoral
Amelia Pérez recoñeceu que a convocatoria se produce nun contexto preelectoral, pero insistiu en que o obxectivo do sindicato non é facer campaña por ningunha formación política, senón introducir no debate público os problemas que afectan á maioría da cidadanía. "Queremos que nesta precampaña e nesta campaña electoral se fale do que realmente lle importa á xente", declarou.
A responsable sindical tamén chamou a reivindicar o orgullo e a conciencia de clase para defender os dereitos laborais e sociais fronte a quen, segundo denunciou, "non respecta os intereses da clase traballadora".
Con esta convocatoria, CCOO reclama unha repartición máis xusta da riqueza e medidas para evitar que as dificultades económicas sigan recaendo sobre as persoas traballadoras. O sindicato chama á mobilización do 11 de novembro para que cuestións como a vivenda, os salarios, o custo da vida e os servizos públicos ocupen un lugar central no debate social e político.