Actualidade

CIG, ELA e Intersindical convocan paros conxuntos o 15 de outubro para reclamar o boicot a Israel e a aplicación do dereito internacional en Palestina.

As organizacións sindicais CIG, ELA e Intersindical de Catalunya anunciaron que farán coincidir os paros convocados para o vindeiro 15 de outubro nos seus respectivos territorios como mostra de rexeitamento ás actuacións do Estado de Israel en Palestina.

Segundo explicaron, a medida busca esixir a gobernos e empresas “medidas políticas e económicas reais e efectivas” que poñan fin á colaboración con Israel. Reclaman que “nin un euro da clase traballadora” se destine a intereses vinculados co Estado hebreo e que se poña freo a calquera relación comercial, militar ou diplomática.

As tres organizacións levan anos compartindo accións e estratexias no marco dun sindicalismo soberanista e de clase, defendendo o dereito a decidir e a prioridade de marcos laborais e sociais propios como ámbitos de loita. Neste caso, sinalan que “o xenocidio en Gaza contra o pobo palestino” fai necesaria a súa mobilización conxunta en Galiza, Euskal Herria e Catalunya.

Ademais, denuncian que Israel continúa “usurpando terras, desprazando poboación local, aplicando estruturas de apartheid e perseguindo a todo un pobo”. Por iso, reclaman a aplicación efectiva do dereito internacional e, en particular, o dereito de autodeterminación do pobo palestino, así como o dereito ao retorno das persoas refuxiadas.

As centrais consideran que, ante a falta de medidas por parte dos gobernos autonómicos, do Executivo estatal e da Comisión Europea, a mobilización social debe ser determinante para forzar accións contra Israel.