Controlado o incendio forestal de Quiroga, que afecta unhas 460 hectáreas e estabilizado o de Silleda
O incendio forestal declarado no concello lucense de Quiroga, na parroquia de Pacios da Serra, quedou controlado ás 21.00 horas deste venres, segundo informou a Consellería do Medio Rural. O lume, que obrigou o pasado mércores a decretar a Situación 2 como medida preventiva pola súa proximidade a núcleos de poboación, afecta provisionalmente unhas 460 hectáreas.
O incendio iniciouse ás 15.25 horas do pasado martes e, para facerlle fronte, mobilizáronse ata o momento 14 técnicos, 75 axentes, 87 brigadas, 60 motobombas, oito pas, dúas unidades técnicas de apoio, 13 helicópteros e 12 avións.
A Situación 2, decretada por mor da proximidade do lume a núcleos habitados, foi desactivada o mesmo mércores.
Por outra banda, a Consellería do Medio Rural informou de que o incendio forestal rexistrado no concello pontevedrés de Silleda, na parroquia de Oleiros, quedou estabilizado ás 19.17 horas deste venres. O lume, iniciado ás 22.49 horas do xoves, afecta provisionalmente unha superficie de 60 hectáreas e localízase no entorno do xacemento de petroglifos de Chao de Petos, no monte de Castro Montaz.
Nos traballos de extinción do incendio de Silleda participaron de maneira acumulada 14 axentes, 19 brigadas, 21 motobombas, tres pas, dous técnicos, tres avións e tres helicópteros.
A Consellería do Medio Rural lembra que a cidadanía pode comunicar a detección de incendios forestais a través do teléfono gratuíto 085. Tamén está dispoñible a aplicación Alume para avisar sobre incendios activos en Galicia. Para denunciar de forma anónima actividades delituosas relacionadas cos incendios forestais está operativo o número 900 815 085. A información actualizada sobre os lumes que superen as 20 hectáreas pode consultarse na conta de X @incendios085.