Convócase comisariado para unha exposición fotográfica das 15 Cidades Patrimonio da Humanidade
O Grupo das 15 Cidades Patrimonio da Humanidade de España abriu un proceso selectivo para elixir o comisariado dunha exposición de fotografía contemporánea centrada nos seus bens culturais. A mostra incluirá obras inéditas sobre Alcalá de Henares, Ávila, Baeza, Cáceres, Córdoba, Cuenca, Eivissa/Ibiza, Mérida, Salamanca, San Cristóbal de la Laguna, Santiago de Compostela, Segovia, Tarragona, Toledo e Úbeda.
A exposición inaugurarase en outubro de 2025 na Real Academia de España en Roma e despois percorrerá espazos expositivos en España e no estranxeiro. Poderán presentar proxectos persoas físicas, individualmente ou en colectivo (cun representante); deben acreditar experiencia en comisariado de artes visuais, idealmente fotografía, e capacidade para vincular o proxecto ao patrimonio cultural.
Cada aspirante —ou colectivo— só poderá concorrer cun único proxecto, e ningunha das persoas autoras poderá participar como artista na exposición. O xurado estará integrado por dous membros da Comisión Executiva do Grupo, un experto en patrimonio cultural designado polo Ministerio de Cultura e un especialista en fotografía designado pola Real Academia Galega de Belas Artes.
O prazo de presentación remata o 10 de xuño ás 23:59 (hora peninsular española), e a resolución farase pública o 18 de xuño. As bases completas e o formulario de inscrición están dispoñibles na web oficial do Grupo de Cidades Patrimonio da Humanidade.