Danza, circo, maxia e cinema para despedir o Festival C
A sexta edición do Festival C encara a súa recta final cunha ampla programación de propostas artísticas de balde para todos os públicos. Danza contemporánea, obradoiros de circo, espectáculos de maxia, cinema ao aire libre e teatro de rúa protagonizan os últimos días desta cita organizada polo Concello de Santiago a través de Compostela Cultura, co apoio da Deputación da Coruña e a colaboración de programas como Apego ou Danza a Escena (INAEM).
Danza en Bonaval
O cemiterio de Bonaval acollerá este luns 25 de agosto Un baile ceibe en comunidade, da Fran Sieira Compañía de Danza, unha creación que parte da tradición galega para reflexionar sobre o xénero e a súa presenza na nosa cultura. A proposta, con dirección artística de Fran Sieira e Sergio R. Suárez e música orixinal de MounQup e Carlos Quintá, intégrase nun proceso participativo no que o público poderá incorporarse á parte final da peza.
Circo no parque
Os Obradoiros de circo no parque, a cargo de Circonove, pechan a súa actividade no parque de Galeras con dúas últimas sesións, o luns 25 e o mércores 27. Durante todo o mes de agosto, estas clases de Novo Circo permitiron experimentar con acrobacias, malabares e danzas, fomentando valores como a convivencia, a creatividade e o respecto.
Maxia para o público infantil
O programa Apego clausúrase co espectáculo Ledicias do Mago Paco, que encherá o parque de Bonaval de humor, ilusións e participación para público miúdo e familias.
Cinema ao aire libre
O martes 26 de agosto proxectarase Daguerrotipos de Agnès Varda na rúa Concepción Arenal (21.45 h), mentres que o mércores 27 será a quenda de Fai o que debas de Spike Lee. Dúas sesións gratuítas que establecen un diálogo arredor da identidade colectiva e as historias de barrio.
Teatro de rúa na Quintana
O xoves 28 de agosto ás 20.00 h, a praza da Quintana recibirá Olympics, de Yllana e Nacho Vilar Producciones, un espectáculo itinerante con catro atletas que organizan a súa particular competición chea de humor e comedia física.
O Festival C mantén así o seu compromiso de encher de creatividade os espazos públicos de Santiago con propostas diversas e accesibles.