Declarado un novo incendio en Manzaneda mentres o de Calvos de Randín supera as 350 hectáreas queimadas
O incendio forestal iniciado este xoves no municipio de Calvos de Randín (Ourense) permanece activo e coa situación 2 declarada, tras arrasar xa unhas 350 hectáreas. Neste caso, a Consellería do Medio Rural mantén a Situación 2 de alerta como medida preventiva pola proximidade do núcleo de As Meaus, no municipio veciño de Baltar.
As labores de extinción continúan, coa incorporación nas últimas horas de medios do Ministerio para a Transición Ecolóxica. Tamén se agarda que esta mañá se sumen os medios aéreos.
Para a súa extinción mobilizáronse, segundo o último reconto oficial, 3 técnicos, 13 axentes, 17 brigadas, 7 motobombas, 2 pas, 2 unidades técnicas de apoio, 8 helicópteros e 9 avións.
Segundo informaron fontes da Consellería do Medio Rural, tamén se declarou un novo incendio, nesta ocasión no municipio de Manzaneda. Comezou sobre a 1.15 horas da madrugada deste venres, na parroquia de Reigada e, polo momento, estímase que a superficie queimada supera as 20 hectáreas.
Para a súa extinción mobilizáronse polo momento 6 axentes, 8 brigadas, 6 motobombas e unha pala.
Ademais, a Consellería do Medio Rural informa de que o incendio forestal rexistrado no concello coruñés do Porto do Son, parroquia de Ribasieira, quedou extinguido ás 19.11 horas de onte.
O lume iniciouse ás 14.42 horas do pasado luns e finalmente afectou unha superficie de 57,24 hectáreas, das cales 50,24 corresponden a monte raso e as sete restantes a arborado. Para a súa extinción mobilizáronse en conxunto, de maneira acumulada, 2 técnicos, 34 axentes, 46 brigadas, 29 motobombas, 2 pas, 2 unidades técnicas de apoio, 7 helicópteros e 5 avións.
A Consellería do Medio Rural lembra que está á disposición da cidadanía o número de teléfono gratuíto 085, ao que deben chamar en caso de detectar algún incendio forestal. Ao mesmo tempo, tamén está dispoñible para a súa descarga Alume, a aplicación para avisar sobre incendios forestais activos en Galicia. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento: 900 815 085. Así mesmo, toda a información actualizada sobre incendios forestais que alcanzan as 20 hectáreas poderá ser consultada na conta aberta de X: @incendios085.