Desactivada a Situación 2 en Ourense e controlado o incendio de Vilardevós-Vilar de Cervos
A Consellería do Medio Rural informou esta tarde da evolución dos incendios forestais en Galicia, con datos recompilados ata as 20:30 horas. A principal novidade foi a desactivación, este mediodía, da Situación 2 en toda a provincia de Ourense, decretada o pasado 12 de agosto para reforzar e axilizar a coordinación dos medios de extinción.
Ademais, quedou controlado o lume de Vilardevós-Vilar de Cervos, que afectaba unhas 900 hectáreas. Pola súa banda, continúan activos catro incendios forestais de máis de 20 hectáreas en Galicia: dous na provincia de Lugo (A Pobra do Brollón-Abrence, con 800 hectáreas e en Situación 2, e A Fonsagrada-San Pedro de Río, con 30 hectáreas) e dous en Ourense (Carballeda de Valdeorras-Casaio, con 5.000 hectáreas, e Avión-Nieva, con 250 hectáreas).
Na provincia de Ourense permanecen estabilizados os grandes incendios de Chandrexa de Queixa e Vilariño de Conso (19.000 ha), Larouco-Seadur (30.000 ha), Oímbra-A Granxa e Xinzo de Limia-Gudín (17.000 ha), A Mezquita-A Esculqueira (10.000 ha) e Carballeda de Avia-Beade (4.000 ha). Tamén seguen controlados os lumes de Maceda (3.500 ha) e Montederramo (120 ha).
En Lugo, ademais do lume de A Pobra do Brollón, continúa controlado o incendio de Carballedo-A Cova (100 ha).
A Consellería lembra que a cidadanía pode chamar ao 085 para avisar da detección dun lume forestal e ao 900 815 085 para comunicar de forma anónima calquera sospeita de actividade incendiaria. A información actualizada sobre incendios que superan as 20 hectáreas pode consultarse tamén na conta de X @incendios085.