Ecoloxistas en Acción Galicia lanza "Bota contas. Paga a pena" para visibilizar o custo da crise ecolóxica
Ecoloxistas en Acción Galicia presentou, coincidindo co Día Internacional contra o Cambio Climático, a campaña «Bota contas. Paga a pena», unha iniciativa de sensibilización e mobilización social que pretende achegar a crise climática e ecolóxica ás preocupacións cotiás da cidadanía galega. A proposta parte dunha idea central: a crise ecolóxica xa ten un custo para a sociedade, aínda que non sempre sexa evidente canto se paga polas súas consecuencias.
O prezo da enerxía, a contaminación do aire, a dependencia do coche, o impacto ambiental dos sistemas de produción e a degradación dos ecosistemas repercuten directamente na economía das familias, na saúde e no benestar. A organización ecoloxista quere poñer o foco nestes custos, que considera ocultos nun modelo económico e produtivo que traslada boa parte dos seus efectos ambientais e sociais ao conxunto da cidadanía.
A campaña tamén busca amosar que apostar por alternativas máis sostibles, xustas e comunitarias non é só unha necesidade ambiental, senón unha oportunidade para mellorar as condicións de vida. Así, fronte á denuncia dos problemas, a iniciativa propón avanzar cara a outras formas de producir, consumir e organizarse.
A campaña desenvolverase a través dunha serie de vídeos divulgativos que empregarán unha linguaxe próxima, situacións recoñecibles e exemplos vinculados á realidade galega para explicar como os problemas ecolóxicos afectan á vida cotiá e que alternativas existen para facerlles fronte.
As pezas seguirán un percorrido narrativo dividido en tres momentos. O primeiro, «Bota contas», invita a identificar os custos económicos, sanitarios e sociais que se agochan detrás de moitas decisións e dos actuais modelos de produción e consumo. A segunda parte, «O cambio», presenta outras formas de actuar e alternativas que permitan reducir os impactos ambientais. Finalmente, «Paga a pena» amosará os beneficios concretos destas transformacións, como o aforro de recursos, a mellora da saúde, a protección da contorna, o fortalecemento das comunidades e unha maior calidade de vida.
A ecoloxía, unha cuestión de saúde e economía
Con esta iniciativa, Ecoloxistas en Acción Galicia quere cuestionar a idea de que a defensa do medio ambiente é unha preocupación secundaria ou allea aos problemas materiais da maioría social. Fronte aos discursos que presentan a transición ecolóxica como un sacrificio, un gasto engadido ou unha responsabilidade exclusivamente individual, a organización sostén que a inacción tamén ten consecuencias e custos, mentres que as solucións ecolóxicas poden achegar beneficios ao conxunto da sociedade.
A entidade lembra, ademais, que a transformación non pode depender unicamente das decisións individuais de consumo. Para avanzar, considera necesarias políticas públicas, alternativas económicas e unha cidadanía informada, activa e organizada que impulse cambios colectivos.
Por iso, cada vídeo incluirá un chamamento á participación social e convidará a cidadanía galega a implicarse na defensa do territorio, da saúde e das condicións de vida.
O lanzamento da campaña o 24 de outubro pretende aproveitar a xornada internacional para lembrar que a emerxencia climática non é unha ameaza afastada, senón unha realidade con efectos no día a día. Nun contexto no que as mensaxes sobre a crise ambiental poden provocar medo, impotencia ou resignación, Ecoloxistas en Acción Galicia aposta por combinar a denuncia dos problemas coa difusión de alternativas e coa presentación dos beneficios de actuar de maneira colectiva.
A mensaxe central de «Bota contas. Paga a pena» é que comprender o custo do modelo actual tamén permite descubrir o que a sociedade pode gañar ao transformalo: tomar conciencia, coñecer outras opcións e organizarse para facelas posibles.