Edugal volverá tender pontes entre formación e emprego do 8 ao 10 de outubro con máis de 60 expositores no Recinto Feiral
O Concello de Pontevedra presentou hoxe a 14ª edición da Feira da Educación de Galicia, Edugal, que terá lugar do 8 ao 10 de outubro no Recinto Feiral. O evento contará cun total de 64 stands de institucións, universidades, centros de FP, entidades empresariais e organizacións de Galicia, España e Portugal.
A concelleira de Promoción Económica, Anabel Gulías, destacou que Edugal “é unha plataforma que tende unha ponte entre a formación e o emprego”, un espazo fundamental para facilitar a inserción laboral da mocidade.
A feira prevé superar os 10.000 asistentes rexistrados en anteriores edicións e contará cun amplo programa de actividades: conferencias, mesas redondas, obradoiros e propostas interactivas.
O evento abrirase o mércores 8 de outubro ás 11.00 h coa conferencia “Cando a IA Responde: Emprego, Competencias e Oportunidades”, a cargo de Zeltia Lado Lago, directora xeral de Formación e Cualificación para o Emprego. Ás 12.00 h celebrarase a inauguración oficial coa presenza de Anabel Gulías.
Entre os espazos destacados figura “Conexión Dual: Práctica + Emprego”, coordinado pola Cámara de Comercio de Pontevedra, Vigo e Vilagarcía, con actividades como o Escape Room Financiero-FINEXIT, mesas sobre relevo xeracional, FP dual e xénero, e un obradoiro práctico de intelixencia artificial aplicada á orientación profesional.
O programa inclúe tamén a conferencia “FUNGATRA: Proxectos que transforman Galicia” o xoves 9, e a presentación do novo Grao en Xestión Cultural da USC. O venres 10 intervirán Pablo Fernández López, secretario xeral de Emprego e Relacións Laborais, e a Consellería de Educación coa charla “A Formación Profesional ábreche as portas a un futuro de éxito”.
Edugal contará coa presenza de centros formativos como o CIFP Carlos Oroza, o IES Politécnico de Vigo, o CIFP Cantería de Galicia, a ESAD de Galicia, a Escola de Conservación e Restauración de Bens Culturais, as universidades galegas, a Universidad Pontificia de Salamanca e a UNED, así como entidades como a Fundación Pont Up Store, Ape Galicia, as Forzas Armadas e a Policía Nacional.