Actualidade

A nova proposta ministerial fixa un calendario de redución de ratios até o curso 2031/2032 e mantén a excepcionalidade de 20 horas lectivas en secundaria, algo ao que a CIG-Ensino se opón.

O Ministerio de Educación, FP e Deportes presentou unha nova proposta sobre a redución do horario lectivo e das ratios no ensino público non universitario, durante a reunión do grupo de traballo sobre condicións de desempeño docentes.

A principal novidade é a redución da excepcionalidade en secundaria e outras ensinanzas, pasando de 21 a 20 horas semanais. Porén, a CIG-Ensino opúxose a esta medida, ao considerar que “a Xunta faría do excepcional a norma”, segundo explicou a súa secretaria nacional, Laura Arroxo.

O documento inclúe tamén que o alumnado con Necesidades Educativas Especiais (NEE) contará dobre nas ratios e fixa un máximo de 22 estudantes por aula en primaria e 25 en secundaria. Porén, non se establecen límites para infantil nin bacharelato, xa que sería necesario modificar o Real Decreto 132/2010, cambio que se prevé acometer nun prazo dun ano desde a entrada en vigor da nova lei.

A federación sindical critica a lentitude do calendario, que se estendería até o curso 2031/2032, cando se completarían todas as reducións. A CIG-Ensino reclama que as medidas se apliquen desde o próximo curso de forma progresiva en todas as etapas.

O plan ministerial prevé:

Curso 26/27: redución a 23 horas en infantil e primaria e a 18, con excepcionalidade de 20, en secundaria.

Curso 27/28: redución de ratios en infantil e primaria (22 alumnos).

Curso 28/29: redución de ratios na ESO (25 alumnos).

Curso 29/30: redución en bacharelato, pendente da modificación do RD 132/2010.

A CIG-Ensino tamén demanda rebaixar as ratios na Formación Profesional, máis aló do previsto no RD 659/2023, e alerta de que a norma mantén excepcionalidades que permiten superar as ratios por falta de espazo ou outros motivos.

O sindicato considera que é necesario mobilizarse contra a Xunta de Galicia, que é quen ten as competencias en materia de persoal e pode aplicar medidas máis rápidas sen agardar á tramitación estatal.

A organización chama a secundar as folgas convocadas para o 28 e 29 de outubro, reclamando recuperar o horario previo ao goberno de Feijóo (21 horas en primaria e infantil e 18 no resto), así como outras reivindicacións: redución da xornada para maiores de 55 anos, incremento retributivo, recuperación do salario de verán para substitucións, reforzo do persoal de atención á diversidade e eliminación da burocracia.