Elsa Muñiz publica New Beginnings, un libro-disco que transforma o piano nun relato emocional sobre a autenticidade e a esperanza
A pianista e compositora galega Elsa Muñiz acaba de lanzar New Beginnings, o seu segundo traballo discográfico, unha proposta profundamente persoal coa que inaugura unha nova etapa vital e artística. Trátase dun libro-disco que forma parte do seu concepto pianotelling, unha experiencia interdisciplinar que transforma a música instrumental nunha narración emocional accesible e próxima.
New Beginnings inclúe nove pezas para piano acompañadas de microrrelatos e caligramas que narran un proceso de renacemento, valentía e busca de autenticidade. A través da súa música, Elsa aborda temas como a saúde mental, a perda, a esperanza ou a celebración do presente, con títulos como Invisible Sadness, Looking on the Brightside, Lost, Isabel ou Let’s Go.
A peza que dá nome ao disco foi gravada nun videoclip na praia de Boiro, o seu lugar natal, cun piano de cola fronte ao mar. Dirixido por White Mamba en colaboración con Roma Audiovisual, o vídeo destaca pola súa beleza estética e emotiva conexión co territorio.
Formada no Conservatorio Superior de Música de Vigo, Elsa completou estudos en Varsovia e na Universidade de Santiago de Compostela. A súa traxectoria combina excelencia académica cunha forte conexión coa súa terra e coas historias que merecen ser contadas.
Con New Beginnings, Elsa Muñiz consolida unha identidade artística honesta e humana no panorama da música instrumental contemporánea. A súa proposta de pianotelling non é un xénero, senón unha experiencia sensorial na que o piano “fala” e conta historias, convidando á reflexión e á emoción.