Entrevista | Reportaxes

A escritora e ilustradora afincada en Paradela publica unha obra para compartir en familia que aborda as transformacións da vida cotiá desde unha mirada próxima, poética e chea de cor

Jessica Fernández

Os cambios forman parte da vida desde a infancia. Cambian as estacións, as amizades, as aulas do colexio ou a dinámica familiar coa chegada dun novo irmán. Sobre esa realidade cotiá constrúe a escritora e ilustradora Estefanía Padullés o seu novo álbum ilustrado, publicado en castelán baixo o título Cambia el mundo... cambias tú e en galego como Cambia o mundo... cambias ti.

A autora, afincada en Paradela, presenta unha obra dirixida aos nenos, pero pensada tamén para ser compartida cos adultos. O libro propón unha lectura pausada e reflexiva sobre a forma na que as persoas afrontan as transformacións que se producen ao longo da vida, un tema que Padullés considera especialmente importante nas primeiras etapas de crecemento.

Acostumada a crear historias cargadas de aventuras e imaxinación, nesta ocasión decidiu adentrarse nun terreo máis emocional. A autora explica que quería abordar a idea de que os cambios son inevitables e que non sempre teñen o mesmo resultado. “Ás veces non pasa nada, ás veces cambian para ben, ás veces cambian para mal”, sinala, destacando que o obxectivo era axudar a traballar a frustración e a adaptación a novas situacións.

A acollida da obra superou as expectativas iniciais da escritora. Segundo recoñece, o libro está conectando especialmente cos máis pequenos porque fala de experiencias que forman parte da súa realidade diaria. O paso a unha nova clase ao comezar o curso, a chegada dun irmán ou os cambios que trae consigo o paso do tempo son algúns dos exemplos que aparecen nas súas páxinas.

A diferenza doutros traballos da autora, marcados por unha maior presenza da fantasía, esta publicación aposta por unha narrativa máis próxima e recoñecible. Precisamente esa proximidade é unha das claves que, ao seu xuízo, están favorecendo a identificación dos lectores coa historia.

Ademais do texto, Padullés asina tamén todas as ilustracións do álbum, realizadas en formato dixital. A creadora recoñece que goza especialmente deste proceso e que nesta ocasión aproveitou para experimentar cun estilo gráfico diferente. “Intentei variar un pouco o estilo de debuxo para non aburrirme e para seguir medrando tamén como ilustradora”, explica.

A obra combina así o relato e a imaxe nunha proposta que a autora define como un libro para ler sen présas. O ton poético do texto e a temática abordada convidan a unha lectura compartida entre pais e fillos, favorecendo o diálogo sobre emocións e situacións que forman parte da vida cotiá.

Tamén o formato foi coidadosamente elixido. O libro presenta un deseño cadrado que facilita o seu manexo e lectura, especialmente entre o público infantil, achegando comodidade tanto a quen le como a quen observa as ilustracións.

Tras a súa publicación, Estefanía Padullés xa traballa na promoción da obra. Entre as próximas citas previstas figura unha presentación no colexio de Paradela durante o mes de setembro. Ademais, a autora espera poder achegar o libro aos nenos de Sarria mediante unha actividade na biblioteca municipal.

Aínda que nos últimos anos tamén se achegou ao mundo da novela, Padullés recoñece que segue sentíndose especialmente cómoda no ámbito do álbum ilustrado. “Gústame moito ilustrar, non vou deixalo”, afirma. Considera que este formato lle permite desenvolver proxectos creativos durante varios meses e, unha vez finalizados, embarcarse en novas historias e novos retos.

Non obstante, tampouco descarta continuar explorando a narrativa dirixida a lectores de máis idade. A autora observa como os nenos que comezaron lendo os seus primeiros libros van medrando e avanzando cara a lecturas máis complexas, polo que lle gustaría seguir acompañándoos nese percorrido literario con obras adaptadas ás distintas etapas de crecemento.

Con Cambia o mundo... cambias ti, Estefanía Padullés amplía unha traxectoria literaria na que destacan títulos como Memoria de sombra y bosque ou A egua de Breogán, obras nas que a imaxinación, os valores educativos e a forza das ilustracións se converteron nalgúns dos seus principais sinais de identidade. O seu novo traballo mantén ese compromiso coa literatura infantil, aínda que nesta ocasión pon o foco nunha cuestión tan universal como necesaria: aprender a convivir cos cambios.