Estudantes da UIE retirarán especies invasoras na contorna do Faro de Corrubedo
Máis de 180 persoas, entre alumnado e profesorado da Universidad Intercontinental de la Empresa (UIE), participarán mañá xoves nunha xornada de voluntariado ambiental na contorna do Faro de Corrubedo. A actividade estará dedicada á retirada da planta invasora Carpobrotus edulis, coñecida popularmente como unlla de gato ou herba do coitelo, que se estende con facilidade e impide o crecemento da vexetación autóctona.
A acción enmárcase no plan PLANCTON, impulsado por Afundación coa colaboración do Concello de Ribeira, e busca contribuír á conservación dos espazos naturais.
Xa o ano pasado, nunha intervención similar dentro do Parque Natural Complexo Dunar de Corrubedo e Lagoas de Carregal e Vixán, o alumnado da UIE conseguiu retirar máis de cinco toneladas e media desta especie exótica invasora.
A Obra Social de ABANCA promove este tipo de actividades de voluntariado ambiental, que inclúen tamén a recollida de lixo mariño en mares e costas galegas, no marco do programa «Educación para a sostibilidade». O obxectivo é concienciar sobre a importancia de conservar os recursos naturais sen comprometer o futuro das novas xeracións.