Fan un recoñecemento póstumo a Valeriano Martínez polo seu compromiso co emprego inclusivo
Valeriano Martínez recibiu hoxe, na Cidade da Cultura, un recoñecemento póstumo polo seu compromiso co emprego público inclusivo. O acto tivo lugar no marco da xornada Construíndo Emprego, organizado pola Federación galega de asociacións en favor das persoas con discapacidade intelectual ou do desenvolvemento (FADEMGA Plena Inclusión Galicia). O encontro pon en valor o acceso ao emprego público das persoas con discapacidade intelectual, un empeño co que o finado amosou unha especial sensibilidade durante toda a súa carreira profesional.
Durante o seu tempo como conselleiro con responsabilidade no emprego público, Valeriano Martínez asumiu o compromiso legal de reservar non menos do 7 % das prazas convocadas para ser cubertas por persoas con discapacidade, ata acadar o 2 % dos efectivos totais. E, entre ese 7 %, polo menos o 2 % se reserve para persoas con discapacidade intelectual.
Foi tamén durante o seu mandato cando se convocou o primeiro proceso selectivo para persoas con discapacidade intelectual na Administración xeral de Galicia e creouse, no seo desta administración, a escala de Persoal de Servizos Xerais, sendo unha das escalas nas que se ten realizado procesos selectivos para persoas con discapacidade intelectual.
Durante o acto, o conselleiro de Facenda e Administración Pública, Miguel Corgos, que recolleu o premio en representación da familia do finado, lembrou que Valeriano Martínez promoveu un intenso reforzo dos servizos públicos e, ao tempo, a implantación de medidas de mellora das condicións de traballo dos empregados públicos. “Trouxo á administración xeral unha cultura de negociación colectiva que se concretou na sinatura dun gran número de pactos e acordos”, abundou. Nese eido, recordou que o seu antecesor no cargo tivo unha especial sensibilidade coa inclusión. “De feito, como conselleiro aprobou a primeira oferta de emprego público específica para persoas con discapacidade intelectual hai agora dez anos”.
A xornada conmemora os 25 anos da creación do Servizo de Emprego e Formación de Fademga, que quixo recoñecer ás persoas, empresas e institucións que fixeron posible o acceso ao emprego ordinario das persoas con discapacidade intelectual. Neste ámbito, a Consellería de Facenda e Administración Pública, recibiu un galardón, recollido pola directora xeral de Emprego Público e Administración de Persoal, Nuria Aguilar, quen agradeceu o premio e quixo, ao mesmo tempo, recoñecer o labor de Fademga, pola súa disposición a colaborar. “Todo o conseguido ata agora en materia de integración no ámbito do emprego público”, afirmou “non sería posible sen a colaboración desta Federación”.
No acto tamén estivo o secretario xeral de Emprego e Relacións Laborais, Pablo Fernández, que interveu na inauguración, así como a directora xeral de Traballo Autónomo e Economía Social, Marta Mariño, que tomou parte no panel arredor das alianzas empresariais que abriron camiño ao emprego con apoio en Galicia, ademais de recoller o recoñecemento concedido por Fademga á Consellería de Emprego, Comercio e Emigración. Ambos representantes autonómicos puxeron en valor a traxectoria da entidade en beneficio das oportunidades laborais das persoas con discapacidade, reafirmando o compromiso e apoio da Xunta para garantir o seu asesoramento e a inserción efectiva no mercado de traballo.