Cultura

O historiador e arqueólogo lucense foi elixido polo pleno da institución tras unha traxectoria de máis de medio século dedicada á investigación, á museoloxía e á divulgación do patrimonio

Felipe Arias, nado en Lugo en 1949, foi elixido na tarde de onte membro correspondente da Real Academia Galega logo de que o pleno da institución aprobase a súa incorporación. O nomeamento recoñece unha ampla carreira profesional vencellada á investigación histórica e arqueolóxica, á xestión museística e á difusión do patrimonio cultural galego.

Ao longo da súa traxectoria, Arias desenvolveu unha intensa labor como historiador, arqueólogo e museólogo. Foi director-conservador do Museo Provincial de Lugo entre 1974 e 1984 e estivo á fronte do Museo do Castro de Viladonga desde a súa creación en 1983 ata 2014, ano no que se xubilou. Na actualidade é profesor investigador ad honorem da Universidade de Santiago de Compostela e conta cunha extensa produción científica elaborada ao longo de máis de cincuenta anos de actividade, á que se suma un destacado labor divulgador a través de publicacións periódicas, monografías, cursos e xornadas especializadas.

Lugués de nacemento e tamén de residencia, o novo académico centrou desde os seus inicios boa parte do seu interese investigador na muralla romana de Lugo. A este monumento dedicou en 1971 a súa tese de licenciatura, recoñecida co premio extraordinario da Universidade de Santiago de Compostela, institución á que estivo ligado como docente ata 1974. Aquel traballo supuxo a primeira achega académica centrada especificamente na muralla e, posteriormente, Arias participou en distintos proxectos de intervención e seguimento, entre eles a elaboración do dossier que permitiu acadar a declaración do monumento como Patrimonio da Humanidade pola UNESCO.