Ferraz confirma a composición da xestora do PSOE dirixida por Luis Ángel Lago Lage
A dirección federal do PSOE deu luz verde á composición da Comisión Xestora que asumirá a dirección do PSdeG-PSOE na provincia de Lugo, un órgano provisional que se constitúe tras a renuncia de José Tomé Roca á secretaría xeral, no contexto da crise interna xerada polas denuncias por acoso sexual presentadas contra el.
A Executiva Federal avala así a proposta formulada pola Comisión Executiva Nacional Galega, que fora avanzada o pasado venres por José Ramón Gómez Besteiro na súa primeira intervención pública tras a dimisión de Tomé.
A nova Comisión Xestora estará encabezada por Luis Ángel Lago Lage, histórico militante socialista natural de Rábade, aínda que vencellado politicamente ao Concello de Cervo desde os anos noventa. Ao longo da súa traxectoria desempeñou distintas responsabilidades orgánicas e institucionais, chegando a exercer como coordinador provincial do partido a comezos dos anos 2000.
Xunto a Lago Lage integraranse na xestora perfís con ampla experiencia política e municipal. Entre eles atópase a deputada no Parlamento de Galicia Patricia Otero Rodríguez, así como varios rexedores da provincia: Roberto Fernández Rico (Ribeira de Piquín), Darío Antonio Piñeiro (Láncara) e Roberto García Pernas (Xermade).
A relación complétase coa exalcaldesa de Portomarín Silvia Rodríguez Díaz, as concelleiras e concelleiros Marina Ramudo Graña (Pol), Ana González Abelleira (Lugo) e Vicente Parra Vizcaíno (Quiroga), ademais de Ana María Hortas Alonso e Miguel Ángel Crende López.
Desde o PSdeG-PSOE subliñan que a constitución desta Comisión Xestora ten como obxectivo garantir a estabilidade interna da organización na provincia de Lugo e asegurar o funcionamento ordinario do partido, mantendo a actividade política e institucional con normalidade.
A formación socialista traslada tamén unha mensaxe de responsabilidade e compromiso coa militancia e coa cidadanía lucense, reiterando a súa vontade de continuar traballando nun proxecto político sólido, útil e centrado nas demandas e necesidades da provincia.