Folga indefinida no servizo de recollida do lixo en Ourense para reclamar un convenio digno
O cadro de persoal de Ecourense, concesionaria do servizo de recollida do lixo e limpeza viaria do Concello de Ourense, decidiu en asemblea convocar unha folga indefinida a partir das 6:00 horas do sábado 1 de marzo. A mobilización responde á falta de avances na negociación dun novo convenio colectivo, despois de 14 meses cos soldos conxelados.
A decisión adoptouse tras 12 reunións negociadoras, tanto co comité de empresa como co Concello, desde que o convenio anterior finalizara o 31 de decembro de 2023. A dirección de Ecourense negouse a aceptar as principais reivindicacións do persoal para os anos 2024, 2025 e 2026, entre as que destacan:
- Subida salarial en base ao IPC.
- Equiparación do valor dos trienios entre categorías, favorecendo especialmente a dos peóns, que perciben os soldos máis baixos.
- No caso de ampliación do convenio a 2027, solicítase a redución da xornada laboral, eliminando un dos dous sábados de traballo obrigatorio ao mes.
A negativa da empresa levou ao comité de folga (formado por representantes da CIG, STL, CCOO, CGT, USO e UGT) a someter a proposta a votación, onde foi rexeitada de forma maioritaria polas máis de 120 persoas asistentes á asemblea, contabilizándose unicamente un voto en contra.
Un servizo en situación de precariedade
Desde a CIG denuncian que a concesión da recollida do lixo e limpeza viaria atópase nunha situación de precariedade, á espera dun novo contrato. O Goberno local non foi quen de aprobar un novo preto de condicións para a renovación do servizo, un documento que recibiu alegacións sindicais e que, tras ser recorrido por varias empresas, foi anulado xudicialmente.
“Volvemos ao punto de partida, pero agora cunha situación agravada: levamos 14 meses sen convenio e cos soldos conxelados”, denuncian desde a CIG.